Җиңү көне алдыннан ветераннарга ярдәм итү өчен акча җыюга бәйле алдау очракларының артуы күзәтелә. Кагыйдә буларак, мондый очракларда җинаятьчеләр хәйрия оешмалары буларак чыгыш ясый, дип кисәтте Россиянең атказанган юристы Иван Соловьев RT белән әңгәмәдә.
Белгеч мошенникларның гамәлләрен алдан танырга өйрәтте һәм алдау корбаны булмаc өчен киңәшләр бирде.
«Хәйрия эшчәнлегенең барлык кагыйдәләрен һәм үтә күренмәлелеген үтәү өчен, акча җыючы оешма һәм хәйрия күрсәтүче физик зат арасында иганә килешүен төзүне таләп итәргә кирәк. Ул гади язма формадан гыйбарәт, килешү хәйрияченең үз ихтыяры белән акчалата ярдәм күрсәтүен билгеләргә мөмкинлек бирәчәк», – дип ассызыклады белгеч.
Шул ук вакытта ветераннарга ярдәм итәргә тәкъдим итүче оешма яки затлар турында мәгълүматны өстәмә рәвештә тикшерергә кирәк. Әгәр акча җыю «хәйрияченең» шәхси банк картасына күчерелә икән, моны акчаларның адресатка барып җитмәячәгенең төп билгесе итеп кабул итәргә була.
