(Чаллы, 8 август, «Татар-информ», « Шәһри Чаллы », Зөлфия Галим). Чаллы шәһәре мэры Наил Мәһдиев җаваплы җитәкчеләр белән бергә ЗЯБ һәм ГЭС бистәләрендәге иҗтимагый киңлекләрне җентекләп тикшерде һәм җитешсезлекләрне бетерү бурычын куйды. Ул Чаллы татар дәүләт драма театры янындагы Марат Бибишев исемендәге парктагы чүп савытларының тышын юарга, мәйданны тәмәке төпчекләреннән чистартырга, агач һәм куакларны тәртипкә китерергә, чәчәкләр утыртырга кушты. Тукай яр буенда газоннарга тиз арада автомат су сибү системасы проектын эшләргә тәкъдим итте. Наил Мәһдиев яңгыр сулары ага торган коелар һәм чәчәк түтәлләрен дә тәртиптә тотарга боерды. Иҗтимагый киңлекләрдә бәдрәфләр мәсьәләсе дә читтә калмады. Мэр физик мөмкинлекләре чикле шәһәрдәшләр өчен барлык уңайлыклары булган бәдрәф ачарга кирәклеген әйтте. Биредә елга ярына төшү юлын төзекләндереп, күперне дә буярга кушты. Тинчурин бульварында исә балалар шәһәрчеген тиешле дәрәҗәгә китерергә һәм паркны яшелләндерергә кирәклеген искәртте. Бу эшләр 20 августка кадәр тәмамланырга тиеш.
