Татар журналистикасы бүлеге студенты: Үзем теләгән редакциядә эшләү мөмкинлеге булды

(Казан, 13 июль, «Татар-информ», Гөлүзә Ибраһимова). Зилә Дәрҗеманова Филология һәм мәдәниятара багланышлар институтының «Татмедиа» агентлыгы белән берлектә әзерләгән программасы буенча журналистика белгечлегенә укый. Ул уку дәверендә булган уникаль мөмкинлекләр турында сөйләде.

«Алдагы елларда да филология һәм журналистика юнәлеше эшләп килде, тик аның форматы башка иде. Без үзебезне журналист итеп сизмәдек. Шамил абый ( „Татмедиа“ акционерлык җәмгыяте генераль директоры — Т-и.иск) һәм Рәмис абый („Интертат“ электрон газетасы баш мөхәррире - Т-и.иск.) белән беренче дәрестә үк практика башланды. Икенче семестрдан практиканы редакцияләрдә үттек. Уникаль мөмкинлек бирелде — үзебез теләгән редакцияне сайладык», — дип сөйләде ул.

Аның сүзләренчә, студентларның күбесе «Татмедиа» газета-журналларында практика үткән. ТНВ һәм ДТРКда практика узу мөмкинлеге дә бирелгән. Зилә Дәрҗеманова практиканы ТНВның яңалыклар бүлегендә узган.

«Без теорияне әле тулысынча белмәсәк тә, анда эшләүче журналистлар белән эшләргә өйрәндек. Интервьюлар алдык, оператор белән бергә эшләргә өйрәндек. Башка журналистларга карап, сорау бирергә өйрәндек. Практиканың уникаль ягы — барысын да эшләп карый алабыз. Төркемдәшләрем дә бу курсны уникаль дип саный», — ди ул.

Студент кыз сүзләренчә, институт тарафыннан бирелгән филология белеме дә көчле. «Татар теле һәм әдәбияттан укытучыларыбыз көчле. Тел белеме һәм практиканың бергә булуы уңышлы нәтиҗә бирер», — дип сөйләде Зилә Дәрҗеманова «Татар-информ» агентлыгында узган матбугат очрашуында.