(Казан, 30 май, «Татар-информ»). 29 майда Башкортстанның Борай авылында Тарихи мәчет ачылды. Имам-мөхтәсиб Рифат Зарипов мәчетнең 1914 елда төзелә башлаганын, әмма төзөлеш туктатылып торганын, бинада төрле елларда клуб, китапханә һәм кинотеатр булуын искәртте.
Россия Мөселманнары Диния нәзарәте рәисе һәм Россия Мөфтиләр шурасы рәисе мөфти шәех Равил Гайнетдин кушуы буенча ачылу тантанасында аның урынбасары Рушан Аббясов катнашты. Бу хакта Россия Мөфтиләр шурасы сайтында хәбәр ителә.
«Аллаһы Тәгалә безнең халыкны сынады. Ниһаять, 2003 елда мөфти Нурмөхәммәт хәзрәт, ул вакытта хакимияттә булган Марс Шаһиев, Башкортстан мөселманнары ярдәме белән мәчет яңадан кайтарылды. Мөфти шәех Равил Гайнетдин Мәскәүдә үз командасы белән реставрация эшләре өчен мөмкин булганны башкарды. Һәм менә 100 елдан соң мәчет яңадан үз вазифасына әйләнеп кайтты» — диде Рифат хәзрәт.
Тантанада Саратов өлкәсе Диния нәзарәте рәисе мөфти Мөкаддәс Бибарсов, Пенза өлкәсе Диния нәзарәте рәисе мөфти Ислам Дашкин, Ульяновск өлкәсе мөселманнары Диния нәзарәте рәисе мөфти Мөхәммәд Байбиков, Башкортостан мөселманнары Диния нәзарәте рәисе мөфти Айнур Биргалин һәм аның беренче урынбасары Әюп Бибарсов бар иде.
Бирегә шулай ук Татарстан Республикасының Баш казые Җәлил хәзрәт Фазлыев, БР Башлыгы каршындагы Дәүләт-конфессиональ мөнәсәбәтләр Советы киңәшчесе Руслан Карамышев, Борай районы хакимияте башлыгы урынбасары Марат Ахунов һәм башка мәртәбәле кунаклар килгән.
