(Чирмешән, 14 май, «Татар-информ», «Безнең Чирмешән» , Кадрия Гамирова). Халыкара «Хәтер бакчасы» акциясе кысаларында, Чирмешән районының җиде мәктәбеннән 150 укучы катнашты. Шешминка, Иске Кади, Лашман, Яңа Элмәле, Бәркәтә, Ивашкино, Югары Кәминкә укучылары барлыгы 300 төп агач үсентесе (чыршы, каен, юкә, миләш) утырткан. Алар мәктәпләр һәм һәйкәлләр янында тамыр җибәрәчәк. Бөек Ватан сугышында һәлак булганнар истәлегенә Лашман укучылары 100 төп чыршы агачы утыртты. Әлеге акциягә, мәктәп укучылары һәм укытучылары белән бергә, ветеран-педагог Әхтәм Фатыйхов та кушылды. Алар бергәләп, мәктәп янында, истәлек бакчасына нигез салдылар.
