(Чаллы, 18 февраль, «Татар-информ», Эльвира Мөхәммәтдинова). Прививка ясау кампаниясе башланганнан бирле Чаллы коронавирус инфекциясенә каршы 14 345 доза вакцина алды.
Шәһәр сәламәтлек саклау идарәсе вәкиле шәһәргә вакцинаның даими рәвештә килүен билгеләп үтте. «Дүшәмбе көнне 3 мең доза алдык, бүген тагын 500», - , дип хәбәр итте журналистларга Сәламәтлек саклау идарәсе башлыгы урынбасары Айгөл Борһанова.
Бүгенге көндә Чаллыда яшәүче 10 мең кешегә прививканың беренче компоненты ясалган, 700 кеше икенче компонентны алган.
КАМАЗда вакцинацияләүнең беренче этабы тәмамлана, «Астейс», «Раритэк» компанияләрендә дәвам итә. «Мобиль бригадалар шәһәрнең барлык сырхауханәләрендә булдырылган. Алар шәһәрнең теләсә кайсы предприятиесенә, анда медицина кабинетлары һәм вакцина саклау өчен шартлар булганда, чыгарга әзер», - диде Борһанова.