(Казан, 8 февраль, «Татар-информ», Гөлнар Гарифуллина). Умыртка сөякләрендә компрессион сыну бөкре китереп чыгаруы ихтимал. «Умырткалар губка кебек матдәдән тора, алар кысыла. Еш кына ул умырткалыкның күкрәк өлешендә була. Компрессион сыну балаларда җиңелчә генә егылганда да булырга мөмкин. Ничә умыртка сынуга һәм имгәнү дәрәҗәсенә карап, кифоз яки бөкре килеп чыгарга мөмкин», — диде Республика балалар клиник хастаханәсе травматолог-ортопеды Фәнис Гыйбадуллин. Аның сүзләренчә, тренировкаларда бала икенчесе өстенә егылса, мәтәлчек атканда, батутларда каты итеп сикергәндә, ешрак умырткалык баганасының 5, 6, 7 умырткалары утыра, компрессияләнә. Кайчак бу халәт соңрак, хәтта бер елдан очраклы гына ачыкланырга мөмкин. «Хәзер мондый очраклар ешайды. Бу технологияләр үсеше белән бәйле: батут үзәкләрендә имгәнәләр, турниктан да еш егылалар, тюбингта шуганда әйләнәләр. Арка белән сузылып ятып егылмасаң да килеп чыга ул, яның белән мәтәлчек атканда да булырга мөмкин», — дип искәртте табиб. Бала егылып, күпмедер вакыт сулый алмаска да мөмкин. Бу арканың күкрәк өлеше белән каты итеп төшкәндә, йә бәрелгәндә шулай була. Фәнис Гыйбадуллин әйтүенчә, кайчак баланың башта бер җире дә сызламыйча, соңрак зарланырга мөмкин, чөнки имгәнү нәтиҗәсендә ялкынсыну соңрак була һәм нерв күзәнәкләре кысыла. Травматолог 3нче умырткадан 8нчесенә кадәр сынган катлаулы очраклар да булганын әйтте. «Табиблар күбрәк неврологик патологиягә карый. Косу булса, ул күбрәк умырткалыкның муен өлеше белән бәйле. Батут үзәкләрендә еш кына беренче муен умырткасының каймыгу очраклары да була, чөнки бала сальто ясый, ялгыш муены беләк кәкрәеп егыла, муен мускулларына зыян килгән була. Бу вакытта балаларда баш авырту, баш әйләнү, косу булырга мөмкин», — диде.