(Казан, 3 февраль, «Татар-информ»). Чаллыда яшәүче 82 яшьлек Василий Пшеничниковка коронавируска каршы прививканың икенче өлешен ясаганнар. Бабай прививканы Автошәһәрнең 7нче поликлинасында ясаткан. Василий Федорович белән бергә аның хатыны һәм улы да прививка ясаткан, өчесе дә үзләрен яхшы хис итә. «Үземне яхшы хис итәм. Прививкадан соң хәлсезлек күзәтелмәде, киресенчә, җиңеллек һәм күңел тынычлыгы тойдым», — диде Василий Федорович. Бабай үзен һәм якыннарын саклау өчен коронавирустан прививка ясатырга булганлыгын әйтте. Ул ел саен грипптан да прививка ясата икән, вакцинация куркыныч авырулардан саклау чарасы дип ышана. Табиблар сүзләренчә, «Спутник V» куркыныч тудырмый. «Анда тере вирус юк. Прививка ясатканнан соң, кеше бөтенләй авырмый яки авыруны җиңел уздырачак», — дип сөйләде Чаллының 7нче поликлиника табиб-эпидемиологы Елена Кәримова.
