(Казан, 15 декабрь, «Татар-информ»). «Татарстан» радиосында Фәридә Кудашева җырлары атналыгы башланды. Бу хакта «Татарстан» радиосы алып баручысы Раил Садри хәбәр итә.
15 декабрь — Татарстанның һәм Башкортстанның халык, Россиянең атказанган артисты, Республикабызның Г.Тукай исемендәге Дәүләт премиясе лауреаты Фәридә Кудашеваның тууына 100 ел. Шул уңайдан Татарстан радиосы Фәридә Кудашева җырлары атналыгы игълан итте.
Атна дәвамында радио эфирында Фәридә Кудашеваның музыкаль мирасына, ул башкарган җырларга, мәшһүр артистның иҗатына багышлап, музыка белгечләре, радио журналистлары әзерләгән тапшыруларга зур урын биреләчәк.
Бүген җырчы иҗатына багышлап дүрт тапшыру эфирга чыккан. Иртәнге һәм кичке музыкаль программалар Фәридә Кудашева җырларыннан төзелгән. Җырчының гаилә, мәхәббәт һәм бәхет төшенчәләре турындагы фикерләре «Пар канатлар» тапшыруында чагылыш тапкан. «Татарстан дулкынында» программасында җырчы белән радио фондында булган әңгәмә тәкъдим ителгән.
Татарстан радиосында игълан ителгән Фәридә Кудашева җырлары атналыгы үткәрү идеясен Башкортстан Дәүләт радиосы да хуплап каршы алган. «Безгә тылмач кирәкми» дигән алмаш тапшырулар циклыннан Башкортстан радиосы әзерләп җибәргән тапшыру эфирга иртәгә — 16 декабрь көнне 13 сәгать 10 минутта чыгачак.
Фәридә Кудашева җырлары атналыгы шимбә көнне җырчы башкаруындагы халык җырлары язмаларыннан төзелгән радиоконцерт белән тәмамлана. Аны 19 декабрь көнне 11 сәгать 10 минутта тыңлап булачак.
