(Казан, 15 декабрь, «Татар-информ», Наталья Рыбакова). Яңа ел бәйрәмнәре Казанда 18 декабрьдә Иске Татар бистәсендә Чыршы бәйрәмен ачудан башланачак. Бу хакта бүген «Татар-информ» мәгълүмат агентлыгында узган матбугат конференциясендә «Туризмны үстерү комитеты» директоры Дарья Санникова хәбәр итте.
«19 декабрьдә Дәрвишләр бистәсендә Чыршы Комсомол мәйданында ачылачак. 23 декабрьдә „Крылья Советов“ паркында Чыршы ачылачак, шулай ук Яңа ел чыршылары шәһәрнең Авиатөзелеш һәм Яңа Савин районнарында барлыкка киләчәк. Килүчеләрне тематик чыгышлар, Кыш Бабай һәм Кар Кызы белән очрашулар көтә. 24 декабрьдә Химиклар мәдәният йорты янындагы "Нарат урманы" паркында Киров һәм Мәскәү районнарында яшәүчеләр өчен 20 метрлы ясалма чыршыдан торган комплекс һәм тимераякларны прокатка алу пункты ачылачак», - дип хәбәр итте ул.
24 декабрьдә «Казан» гаилә үзәге янында ачылачак 35 метрлы чыршы Казанның төп Яңа ел символы булачак. Ул 10.00 сәгатьтән 22.00 сәгатькә кадәр, ә Яңа ел төнендә — иртәнге өчкә кадәр эшләячәк. Мәйданчыкта сәүдә рәтләре, төрле тамашалар оештырылачак. Кремль яр буе быел ретро-стильдә бизәләчәк.
