Быелгы «Манзара» тантанасында Раил Нургалиев Муса Галләмов белән көрәшәчәк
(Казан, 13 гыйнвар, «Татар-информ», Ләйсән Рәхмәтуллина). Дүртенче тапкыр үтәчәк тантанада «Манзара-2018» премиясе иясе Раил Нургалиев һәм «Манзара-2019» җиңүчесе Муса Галләмов аерым приз фонды өчен көч сынашачак. Җиңүче 150 мең, ә җиңелүче 100 мең сум алачак.
Батырлар икесе дә көрәш буенча Россия чемпионнары. «Манзара» спорт-музыкаль премиясен тапшыру быел 18 гыйнварда Казанның Цирк аренасында үтәчәк.
«Көрәшче буларак минем зур хыялым бар — көрәшче егетләребезне таныту. Аларны кечкенә малайларның кумирларына әйләндерү һәм шуның аркылы үзебезнең спорт комплексларыбызга яшь буынны җәлеп итү», — дип билгеләде «Манзара»ның максатын ТР спорт министры беренче урынбасары Хәлил Шәйхетдинов.
Быел аренада Татарстан районнарының Сабан туе батырлары гына түгел, ә төрле ярышларда зур җиңүләр яулаган батырлар да, көрәшергә теләүчеләр дә катнаша алачак.
Шулай ук иганәчеләр тәкъдиме белән 100 мең сумны тәшкил иткән приз фонды өчен Риназ Кәлимуллин һәм Булат Мусин көрәше дә көтелә.
«Манзара» башта коммерция проекты буларак барлыкка килде, артистлар гына чыгыш ясый иде. Батырларны вакыт үтү белән халык оныта башлый. Менә шушы максаттан бүгенге спорт-музыкаль премиясе туды», — дип сөйләде «Манзара» премиясе директоры Айдар Шәймәрданов.
«Соңгы елларда төрле кагыйдәләр белән эшләп карадык. Һәрбер ятканга да кисәтүләр ясадык. Бу ярышны үзебезнең 2013 елда Халыкара көрәш федерациясе, Россия һәм Татарстан көрәш федерацияләре белән расланган кагыйдәләр белән үткәрәчәкбез. Татарча көрәшнең асылы да шунда бит — көрәшче көндәшен келәмнән аерып алып, күтәреп аркасына салырга тиеш», — диде хөкемдар Фәрит Шәйхетдинов.
«Манзара» премиясе кысаларында быел беренче тапкыр сумо көрәше дә оештырылачак.