(Казан, 17 декабрь, «Татар-информ»). Самара шәһәренең «Яктылык» мәктәбендә «Сәләт» III Бөтенроссия педагогик осталык конкурсында катнашучыларны бүләкләделәр. Конкурс үзе Казанда узды. Бу хакта Бөтендөнья татар конгрессы матбугат хезмәте хәбәр итә.
Быел оештыручылар Россиянең башка төбәкләрендә (Идел буе) яшәгән катнашучыларның да теләкләрен искә алды, шуңа күрә бу чарада читтән торып катнашу мөмкинлеге бирелде. Моның өчен башка өлкә вәкилләре оештыру комитеты адресына үз чыгышларының видеоларын җибәрде.
Читтән торып үткәрелгән конкурста «Йолдыз» бию театры һәм яшь вокалчы Альмира Сәитова катнашты. Алар 1 дәрәҗә лауреат, ә педагоглар Рәхмәт хатына лаек булды.
Җиңүчеләргә бүләкләр тапшыру «Яктылык» мәктәбендә узды. Дипломнарны «Мирас» балалар һәм яшүсмерләр фестиваль-конкурсы директоры Сәитов Искәндәр Зиннур улы тапшырды.
