Moskwa, Tula, Saransk şäherlerine pilotsyz uçar hüjümi edildi
Moskwa, Tula we Saransk 7-nji maýa geçilýän gije pilotsyz uçar hüjümlerine sezewar bolandygyny habar berdi. Deslapky maglumatlara görä, pilotsyz uçarlar Tuladaky harby desgalara hüjüm etdi, Saranskde optiki süýüm öndürýän zawodda ýangyn döredi.
Mordowiýanyň başlygy Artem Zdunow Saranskda "pilotsyz uçar howpuny" yglan etdi. Duýduryş ulgamy işledildi. Resmi howpsuzlyk düzgünlieriniň berjaý edilmegine çagyrdy.
“Astra” telegram kanaly ýerli ýaşaýjylar tarapyndan düşürilen wideony çap etdi, onda uly tüsse sütünleri görünýär.
Şaýatlaryň sözlerine görä, ýerli wagt bilen ir sagat 6: 00-da olary duýduryş sirenasy oýardy we senagat sebitleriniň birinde bolan birnäçe güýçli partlamanyň sesleri eşidildi.
“Şondan soň Himmaş sebitindäki ýerli zawodyň golaýynda ýangyn başlandy” diýip, “Şot” ýazýar.
Şeýle-de, “Astra” Himmaş sebitinde güýçli ýangynyň bolandygyny habar berdi. Telegram-kanalyň žurnalistleri Saranskdäki zarbadan soň turan ýangynyň bolan ýerini anyklap, “Optiki süýüm ulgamlary” zawodynyň we ýene-de bir binanyň ot alandygy baradaky netijä geldiler.
"Operatiwniý WSU " kanaly hem pilotsyz uçarlaryň süýüm optiki önümçilik zawodyna zarba urandygyny ýazýar.
Pilotsyz uçar hüjüminden soň şäher mekdeplerinde, uniwersitetlerde we çagalar baglarynda sapaklar ýatyryldy, hüjümleriň netijelerini görkezýän suratlaryň, wideolaryň we maglumatlaryň çap edilmegine gadaganlyk girizildi.
7-nji maýa geçilýän gije, şäher häkimi Sergeý Sobýaniniň ýazmagyna görä, rus paýtagtyna aralaşan pilotsyz uçarlar urlup ýykyldy. Resminiň sosial ulgamlarda beren birnäçe habarynda aýdylmagyna görä, Moskwanyň eteginde 17 pilotsyz uçar ýok edildi. Sobýanin dron hüjümleriniň netijeleri barada hiç zat ýazmady.
Rosawiatsia Moskwanyň demirgazyk-günbataryndaky Şeremetýewo howa menziliniň ýapylýandygyny habar berdi.