Özbegistanyň, Gyrgyzystanyň we Täjigistanyň liderleriniň ilkinji sammiti Hojantda geçer
Özbegistanyň, Gyrgyzystanyň we Täjigistanyň prezidentleri – Şawkat Mirziýoýewiň, Sadyr Žaparowyň hem-de Emomali Rahmonyň – gerijek duşuşygy “sebit hyzmatdaşlygyny pugtalandyrmakda möhüm ädim bolar” diýip, Gyrgyzystanyň Ministrler Kabinetiniň başlygynyň orunbasary Edil Baisalow Birleşen Milletler Guramasynyň Adam hukuklary geňeşiniň Ženewada geçirilen 58-nji mejlisinde aýtdy.
“Biz iň bir çylşyrymly meseleleri hem dialog, özara hormat we ynam ýoly bilen çözüp bolýandygyny subut etdik” diýip, Baisalow gyrgyz-täjik serhedi babatyndaky ahyrky ylalaşygy teswirledi.
Özbegistanyň, Gyrgyzystanyň we Täjigistanyň premýer-ministrleri – Abdulla Aripow, Adylbek Kasymaliýew we Kohir Rasulzoda – ýanwaryň başlarynda üç ýurduň serhedinde bilelikde ýygnak geçirdiler.
Olar öz ýurtlarynyň “söwda, logistika, suw we energetika serişdeleri, medeni-ynsanperwer gatnaşyklar ýaly möhüm ugurlarda hyzmatdaşlygy ösdürmäge uly mümkinçilikleriniň bardygyny” bellediler. Resmi beýanata görä, olar öz ýurtlarynyň arasyndaky gatnaşyklary giňeltmekde serhetaşa we sebitara hyzmatdaşlygyň örän möhüm faktor bolandygyny aýtdylar.