Türkmen wekiliýeti durmuş-ykdysady hukuklar boýunça hasabat bilen çykyş edýär
BMG-niň Ykdysady, durmuş we medeni hukuklar boýunça komitetiniň 77-nji sessiýasynyň çäklerinde geçirilýän diňlenişikde Türkmenistanyň milli hasabatyna hem-de adam hukuklaryny goraýjy toparlaryň alternatiw hasabatlaryna seredilýär.
Türkmen häkimiýetleri adam hukuklarynyň meseleleri babatynda Türkmenistanda adamyň, ilkinji nobatda, durmuş-ykdysady hukuklaryny ileri tutýandyklaryny aýdyp gelýärler. Ýöne adam hukuklaryny goraýjy toparlar Türkmenistanda raýatlaryň syýasy we raýat azatlyklary bilen bir hatarda olaryň durmuş-ykdysady hukuklarynyň hem ýeterlik derejede kanagatlandyrylmaýandygyny aýdyp gelýärler.
Türkmenistanda raýatlar ýyllarboýy dowam edýän ykdysady kynçylyklardan, azyk howpsuzlygynyň durnuksyz üpjün edilmeginden, giň ýaýran işsizlikden hem-de raýatlaryň durmuş goraglylygyň gözden salynmagyndan ejir çekip gelýärler.
Ýöne hökümet resmileri ýa-da döwlet eýeçiligindäki köpçülikleýin habar beriş serişdeleri şeýle meseleleri gozgamaýar. Resmi metbugat köplenç ýurtda bina edilýän kaşaň-kaşaň binalary, myhmanhanalary, ýaşaýyş jaýlaryny we beýleki desgalary ýurduň ykdysady ösüşlerine delil görkezýär.
Mundan ozal, türkmen wekiliýeti ilkinji gezek 2011-nji ýylda, soňra 2018-nji ýylda raýatlaryň ykdysady, durmuş we medeni hukuklarynyň berjaý edilişi boýunça milli hasabat bilen çykyş edipdi.