Парванда зидди 200 тан дар Тоҷикистон барои қочоқи инсон
Мақомоти расмии Тоҷикистон мегӯянд, дар муддати ду сол ба зидди тақрибан 200 нафар, аз ҷумла 80 зан бо иттиҳоми қочоқи инсон ва аз ҷумла, водор кардани духтарон ба танфурӯшӣ парвандаи ҷиноӣ боз кардаанд.
Дар як гузориши тозаи ҳукумат ба Созмони Милал, ки Радиои Озодӣ ҳам онро имрӯз дид, омадааст, ки ин афродро аз солҳои 2023 то соли 2025 ба ҷавобгарӣ кашидаанд ва дар ин муддат 55 парванда дар додгоҳҳо баррасӣ шуда ва аз ҷумла 38 зан барои ин ҷиноят ҷазо гирифтаанд.
Дар муддати ин солҳо бештар аз 600 шаҳрванди Тоҷикистон ғайриқонунӣ ба ҷое барои танфурӯшӣ ва ё кор бурда ва истисмор шудаанд.
Мақомоти расмӣ вақтҳои ахир дар бораи ба кишварҳои арабӣ бурдану ба танфурӯшӣ маҷбур кардани духтарони тоҷик мегӯянд ва чанде пеш як овозхони начандон шинохта дар кишварро бо айни иттиҳом дастгир кардаанд.
Созмонҳои ғарбӣ гуфтаанд, ки талошҳои ҳукумати Тоҷикистон барои пешгирӣ аз истисмори шаҳрвандон ва қочоқи онҳо кофӣ нест ва бояд дар ин бештар саъй кунад.