Мунтахаби наврасони Тоҷикистон қаҳрамони CAFA-2026 шуд

Дастаи мунтахаби наврасони то 16-солаи Тоҷикистон зери раҳбарии Ҷаъфар Аҳмадов, ки бозии чаҳорумашро дар мусобиқаи қаҳрамонии Ассотсиатсияи футболи Осиёи Марказӣ -2026 бо тими Узбекистон бо ҳисоби 0:0 анҷом дод, бори панҷум қаҳрамони CAFA гардид.

Бозии даври охирини мусобиқа байни футболбозони навраси Узбекистону Тоҷикистон, ки 13-уми апрел дар варзишгоҳи “Дӯстлик”-и шаҳри Тошканд сурат гирифт, бидуни гол хотима ёфт.

Қаблан дастаи мунтахаби наврасони Тоҷикистон (U-16) дар мусобиқаи қаҳрамонии СAFA-2026 бар тимҳои Туркманистон (5:1), Қирғизистон (4:0) ва Афғонистон (3:2) ғалаба карда буд.

Мусобиқаи қаҳрамонии Ассотсиатсияи футболи Осиёи Марказӣ (CAFA)-2026 дар варзишгоҳи “Дӯстлик”-и Тошканд бо иштироки дастаҳои мунтахаби наврасони Афғонистон, Қирғизистон, Тоҷикистон, Туркманистон ва Узбекистон аз 6-ум то 13-уми апрел баргузор шуд.

Пас аз натиҷагирии бозиҳои панҷ даври мусобиқа дастаи мунтахаби наврасони Тоҷикистон бо 10 имтиёз (3 пирӯзӣ ва 1 мусовӣ) дар ҷадвал мақоми аввалро касб намуда, бо Ҷоми қаҳрамонӣ ва медалҳои тило сарфароз гардид.

Тими мизбон – Узбекистон – бо 8 имтиёз дар ҷойи дуюм қарор гирифт ва бо медалҳои нуқра мукофотонида шуд. Мунтахаби Қирғизистон, ки бо 6 имтиёз ҷойи сеюмро ишғол кард, соҳиби медалҳои биринҷӣ гардид.

Ду бозигари мунтахаби Тоҷикистон бо ҷоизаҳои инфиродӣ сарфароз шуданд. Биҳиштӣ Раҷабзод ҷоизаи "Бозигари муфидтарин" (MVP)-ро ба даст овард. Сиёвуш Назаров бошад, бо задани чаҳор гол беҳтарин нишонзан эътироф гардид.

Бояд зикр намуд, дастаи мунтахаби наврасони Тоҷикистон дар таърихи худ бори панҷум дар мусобиқаи қаҳрамонии Ассотсиатсияи футболи Осиёи Марказӣ пирӯз шуд. Аз ин пеш футболбозони навраси тоҷик солҳои 2019, 2022, 2023 ва 2025 қаҳрамони CAFA гардида буданд.