Парванда ба зидди шавҳар барои то ба ҳадди худкушӣ расондани ҳамсар
Вазорати корҳои дохилии Тоҷикистон аз боздошти марде хабар додааст, ки ба гуфтаи вазорат, бо бадрафториву зулму ситам ба занаш, ӯро то ба ҳадди қасди худкушӣ расонидааст.
Вазорат рӯзи 21-уми январ гуфт, як сокини 28-солаи ноҳияи Айнӣ, “аз соли 2018 то ин ҷониб мунтазам бо роҳи таҳдид шаъну шарафи ҳамсараш ҷавонзани 26-солаи сокини ҳамон ҷоро паст зада, бо баҳонаи бо шахсони бегона муносибати маҳрамона дошта ва гӯё фоҳиша мебошад, дашномҳои кабеҳ намудааст.”
Дар баёния ҳамчунин омадааст, ки шавҳари зан ҳамчунин рӯзи 29-уми ноябри соли гузашта аз бадрашкӣ ҳамсарашро дар хона латукӯб ва захмӣ кардааст. Бо идомаи ҳамин аҳвол то моҳи январи имсол ба гуфтаи вазорат ҳамсар дигар ба таҳқиру бадрафториҳои шавҳар тоб наёварда, рӯзи 17-уми январ “бо мақсади худкушӣ бо корди хоҷагӣ як маротиба ба шикамаш зарба зада, қасди худкушӣ карда, ҷароҳат бардоштааст.”
Назари гумонбар дар ҷиноят маълум нест ва вазорат ҳам нагуфтааст, ки ӯро боздошт кардаанд, ё на. Дар баёнияи вазорати корҳои дохилӣ омадааст, ба зидди ҷавони 27-сола бо иттиҳоми то ба ҳадди худкушӣ расондани каси дигар парвандаи ҷиноӣ боз кардаанд, ки ҷазо барои ин ҷиноят дар Тоҷикистон аз панҷ то ҳашт соли дар зиндон аст.
Зӯроварӣ ба зан дар Тоҷикистон ба қавли ҳомиёни ҳуқуқ як кори маъмулист, вале занон ҳам ба ҷое шикоят намекунанд ва мақомоти интизомӣ ҳам онро ҷанҷоли хонаводагӣ меноманду эътино намекунанд.