Петро Порошенко, раиси ҷумҳури собиқи Украинаро баъди сирояти коронавируси нав ва аломатҳои бемории илтиҳоби шуш дар бемористон бистарӣ кардаанд. Дар ин бора ҳамсараш Марина Порошенко рӯзи 3-уми октябр хабар дод. Ӯ дар як паёми видеоӣ дар Фейсбук гуфт, ки Порошенкоро дар шифохонае дар Киев бистарӣ кардаанд.
Мария Порошенко дар видео мегӯяд: “Бо вуҷуди онки шавҳари ман илтиҳоби дутарафаи шуш дорад, аммо қавӣ аст ва инро дар муборизааш бо беморӣ нишон медиҳад.” Раиси ҷумҳури собиқи 55-сола рӯзи 29-уми сентябр гуфт, ки озмоиши тиббӣ нишон дод, ки ӯ бемории COVID-19 шудааст ва ҳоло дар хона муолиҷа мегирад. Петро Порошенко бемории қанд дорад ва коронавирус аҳволи ин беморонро гоҳо бад мекунад.
Миллиардери украинӣ, ки ширкатҳои қаннодӣ дорад, ҳоло узви порлумон ва раиси Ҳизби Ҳамраъйӣ бо Аврупо аст. Ӯ баъди ғасби нимҷазираи Қрим аз тарафи Русия дар соли 2014 раиси ҷумҳури Украина шуд. Дар Украина, ки аҳолиаш тақрибан 40 миллион нафар аст, ба гуфтаи мақомоти расмӣ коронавируси нав ба 220 ҳазор кас сироят карда ва бештар аз 4,300 нафарро куштааст.
