Саймуъмин Ятимов, раиси Кумитаи давлатии амнияти миллии Тоҷикистон ба Кобул сафар карда, бо мақомоти афғон гуфтугӯ кардааст.
Дар хабаре, ки рӯзи панҷшанбеи 10-уми сентябр дар сайти расмии Вазорати дифои Афғонистон нашр шуд, гуфта мешавад, ки Асадуллоҳ Холид, сарпарасти Вазорати дифои он кишвар ва Саймуъмин Ятимов дар бораи ҳамкориҳои марзӣ, мубориза бо терроризм ва мавзуи сулҳ, гуфтугӯ кардаанд.
Дар ин идомаи ин хабар омадааст, ки сарпарасти Вазорати дифои Афғонистон аз ҳамкориҳои Тоҷикистон бо Афғонистон дар бахшҳои гуногун изҳори итминон карда, бар идомаи ҳамкориҳои ду кишвар таъкид намудааст.
Мақомоти Тоҷикистон ҳанӯз дар робита ба ин сафари оқои Ятимов ва муҳтавои гуфтугӯи ӯ бо мақомоти Кобул хабаре нашр накардаанд.
Раиси Кумитаи давлатии амнияти миллии Тоҷикистон дар моҳи майи соли 2018 низ ба Кобул сафар карда, бо мақомоти баландояи Афғонистон роҷеъ ба амнияти минтақа гуфтугӯ карда буд.
Сафари оқои Ятимов ба Афғонистон дар ҳоле сурат мегирад, ки қарор аст фардо, шанбеи 12-уми сентябр дар шаҳри Давҳа-пойтахти Қатар, гуфтугӯҳои сулҳ миёни ҳукумати Афғонистон ва гурӯҳи Толибон оғоз шавад. Тоҷикистон гуфтааст, аз раванди сулҳ дар дар Афғонистон бо раҳбарии ҳукумати он кишвар ҳимоят мекунад.
Чанд рӯз қабл раиси ҷумҳури Тоҷикистон Эмомалӣ Раҳмон бо ҳамтои афғонаш Ашраф Ғанӣ телефонӣ суҳбат карда буд. Аз ин пештар чунин тамоси телефонӣ миёни Сироҷиддин Муҳриддин, вазири умури хориҷии Тоҷикистон бо Ҳаниф Атмар, сарпарасти вазорати умури хориҷии Афғонистон сурат гирифта буд. Расонаҳои давлатии Тоҷикистон он замон навиштанд, ки раванди сулҳи Афғонистон ва густариши ҳамкориҳо миёни Душанбеву Кобул аз мавзуъҳои меҳварии гуфтугӯ миёни тарафҳо будааст.
Тоҷикистон бо Афғонистон беш аз 1400 километр марзи назораташ душвор дорад. Дар кишвари ҳамсоя беш аз чиҳил сол боз ҷанг идома дорад ва талошҳо барои созиши сулҳ ҳанӯз ба ҷое нарасидаанд. Мақомоти тоҷик ҳамвора аз таҷаммуи ҷангиёни хориҷӣ дар марзҳояш бо Афғонистон, ки дар миёни онҳо шаҳрвандони Тоҷикистон низ ҳастанд, нигаронӣ мекунанд.
