Дар маркази вилояти Суғд панҷоҳ касро барои риоя накардани қоидаҳои беҳдоштӣ, аз ҷумла надоштани ниқоби тиббӣ, ҷарима кардаанд. Дар ин бора дафтари матбуоти ҳукумати Хуҷанд рӯзи 29-уми август хабар дод.
Ба иттилои манбаъ, ин афрод дар пайи як амалиёти намояндагони давлат дар бозору марказҳои дилхушӣ ҷарима шудаанд: "Маълум гардид, то ҳол аксари фурӯшандагон ва харидорон қоидаҳои оддии беҳдоштиро риоя намекунанд. Шаҳрвандон озодона бидуни ниқоб хариду фурӯш менамоянд."
Бино ба тағйироте, ки порлумони Тоҷикистон рӯзи 10-уми июн ба Кодекси ҳуқуқвайронкунии маъмурӣ ва Кодекси ҷиноӣ ворид кард ва баъдан онро Маҷлиси Миллӣ пазируфту раиси ҷумҳур имзо гузошт, сокинонро барои надоштани ниқоби тиббӣ аз 116 то 290 сомонӣ ҷарима мебанданд.
Паҳн кардани бемориҳои хавфноки сироятӣ аз 2 то 5 сол, дар сурати такрор аз 5 то 10 сол ҳабсро дар пай дорад.
Бархе аз сокинон ҳамвора гуфтаанд, ки нархи ниқоби тиббӣ гарон аст ва ҳар рӯз наметавонанд онро иваз кунанд.
Вазорати тандурустии Тоҷикистон рӯзи 28-уми август бо нашри баёнияи расмӣ дар вебсайташ хабар дод, ки дар умум аз рӯзи 30-юми апрел коронавируси нав дар саросари кишвар ба 8481 нафар сироят кардааст, вале тақрибан 86 дар сади онҳо, ё 7276 кас аз чанги ин беморӣ раҳо шудаанд. Талафот аз COVID-19, ба гуфтаи мақомот, 68 нафарро ташкил медиҳад.
