Раиси Шӯрои олимпии Осиё шайх Аҳмад Ал-Фаҳад Ас-Сабоҳ ноиби нави президенти ШОО-ро оид ба Ҳаракати олимпӣ дар Осиё муаррифӣ намуд ва санаи Бозиҳои осиёӣ дар иншооти сарпӯшида ва ҳунарҳои размиро, ки моҳи майи соли 2021 дар Тайланд баргузор мешавад, эълон кард. Дар ин бора сомонаи расмии Шӯрои олимпии Осиё (ШОО) хабар додааст.
Ба иттилои ин манбаъ, Шайх Аҳмад дар як нома ба аъзои Кумитаи иҷроияи ШОО ва 45 кумитаи миллии олимпӣ навиштааст, "ман бо хушнудӣ ба шумо иттилоъ медиҳам, ки тибқи муқаррароти Конститутсияи ШОО, ноиби президенти Кумитаи миллии олимпии Тайланд Дато Сери Чайяпак Сириват ноиби президенти ШОО аз шаҳри мизбони Бозиҳои VI осиёӣ дар иншооти сарпӯшида ва ҳунарҳои размӣ таъйин шуд. Шӯрои олимпии Осиё сана ва барномаи варзишии Бозиҳои шашуми осиёӣ дар иншооти сарпӯшида ва ҳунарҳои размиро, ки соли оянда дар Тайланд баргузор мешавад, эълон кард".
Дар мактуби мудири кулли ШОО Ҳусейн ал-Мусаллам ба Кумитаи миллии олимпии Тайланд санаи баргузории Бозиҳо аз 21-уми май то 30-юми майи соли 2021 зикр шудааст. Бозиҳо дар ду шаҳр - Бангкок ва Паттайя - баргузор мешаванд.
Ёдовар мешавем, ки 23-юми апрел ШОО ва Кумитаи миллии олимпии Тайланд маросими имзои қарордодро баргузор карданд.
Ҷаноби Ал-Мусаллам гуфт: «Мо хушнудем, ки санаро тасдиқ намоем. Мо дарк мекунем, ки соли 2021 аз сабаби санаи нави баргузории Бозиҳои олимпӣ ва паралимпӣ дар Токио соли бошиддат аст, аммо мо тавонистем замони холиро дар тақвими варзиш дар ҳафтаи охирини моҳи май, ду моҳ пеш аз Бозиҳои олимпӣ, пайдо кунем. ”
Ба барномаи бозиҳо 28 намуди варзиш ва ду намуди намоишӣ дохил мешаванд: варзиши сабук дар дохили бино, билярд, боулинг, рақси варзишӣ, шоҳмот, футзал, роликтозӣ, кӯҳнавардӣ, шиноварии кӯтоҳ (25 м), бокси тайландӣ, ҷиу-ҷитсу, дучархаронӣ, ҳалқа такрау / сепак такрау, кураш, флорбол, нетбол, таэквондо, ҳоккейи дохили иншоот, каратэ, киберспорт, бадминтон, пенчак-силат, черлидинг, самбо, қайиқронӣ дар дохили иншоот, волейбол, баскетбол 3x3, гуштии анъанавӣ, кикбоксинг. Ду намуди намоишӣ: текбол, авиаспорт (варзиши ҳавоӣ, рақобати ҳавопаймои бе сарнишин).
Зимнан, Бангкок соли 2005 аввалин Бозиҳои осиёиро дар иншооти сарпӯшида ва соли 2009 Бозиҳои осиёии ҳунарҳои размиро (ҳар ду бозиҳо соли 2013 муттаҳид шуданд) мизбонӣ кардааст.
Варзишгарони тоҷик дар Бозиҳои V осиёӣ дар иншооти сарпӯшида ва ҳунарҳои размӣ, ки аз 16-ум то 27-уми сентябри соли 2017 дар пойтахти Туркманистон – шаҳри Ишқобод - баргузор шуд, ҳамагӣ 51 медал (3 тилло, 14 нуқра ва 34 биринҷӣ) ба даст оварданд.
Дар ҳайати дастаи мунтахаби Тоҷикистон 125 варзишгар дар 15 намуд ширкат кард. Намояндагони Тоҷикистон дар 9 намуд медал гирифтанд. Мунтахаби Тоҷикистон дар ҳисоби умумидастаӣ аз рӯи сифати медалҳо дар ҷойи 17-ум ва аз рӯи шумораи умумии медалҳо дар ҷойи 8-ум қарор гирифт.
Се медали тиллоро ба мунтахаби Тоҷикистон Миҷгона Самадова дар риштаи кикбоксинг миёни занон дар вазни то 60 кило, Акмалиддин Каримов дар мусобиқаи самбои варзишӣ миёни мардон дар вазни то 57 кило ва Беҳрӯзи Хоҷазода дар рақобатҳо оид ба самбои варзишӣ дар вазни то 74 кило оварданд.
Дар Бозиҳои V осиёӣ дар иншооти сарпӯшида ва ҳунарҳои размӣ дар Ишқобод варзишгарон дар таркиби 64 дастаи мунтахаб аз кишварҳои Осиё, Уқёнус, инчунин дастаи паноҳандагон зери парчами Шӯрои олимпии Осиё ширкат варзида, оид ба 21 намуди варзиш рақобат карданд.
Мусобиқот аз рӯи барномаи Бозиҳои V осиёӣ дар иншооти сарпӯшида ва ҳунарҳои размӣ дар Ишқобод бо пирӯзии мизбонон ба поён расид. Варзишгарони туркман, ки аз аввал то охири бозиҳо пешсафиро аз даст надоданд, дар ҳисоби умумидастаӣ бо касби 245 медал (89 тилло, 70 нуқра ва 86 биринҷӣ) ҳам аз рӯи сифати медалҳо ва ҳам аз рӯи шумораи умумии медалҳо мақоми аввалро азони худ карданд.
Умуман, дар ин бозиҳо 36 даста бо медалҳои бозиҳо мукофотонида шуд. Варзишгарони 28 кишвар ба унвони қаҳрамонӣ даст ёфта, бо медалҳои тилло сарфароз гаштанд.
