Намояндагони гуруҳи кишварҳои содиркунандаи нафт - ОПЕК, инчунин Русия ва чанд кишвари дигар рӯзи панҷшанбе нақшаи кам кардани истихроҷи нафтро ба хотири муътадил гардонидани бозор баррасӣ мекунанд.
Мулоқоти мазкур дар ҳоле баргузор мешавад, ки бозори нафт дар даҳсолаҳои охир бузургтарин уфтро шоҳид шуд.
Ин уфт дар пайи густариши вируси корона ба миён омад. Вабо ихтилофи назари байни Русия ва Арабистони Саудиро дар мавриди кам кардани истихроҷи нафт густариш дод.
Пештар аз ин Владимир Путин, президенти Русия гуфт, ки кишвараш омодаи гуфтугӯ бо шарикон дар доираи ОПЕК+ ва ҳамкорӣ бо ИМА аст. Путин гуфт, айни ҳол сухан аз коҳиши истихроҷи нафт дар ҳаҷми 10 миллион бушка дар рӯз меравад.
Маскав интизор дорад, ки ИМА, Бразилия, Норвегия, Канада, Мексика ва дигар кишварҳо ба гуфтугӯҳои коҳиши нафт мепайванданд.
Доналд Трамп, президенти ИМА пештар аз ин гуфт, фикр намекунад, ки кишвараш истихроҷи нафтро кам хоҳад кард. "Мо то ин замон кам кардем ва ба бозор мутобиқ шудаем", - гуфта буд Трамп.
