Пас аз як соли таҳқиқу баррасии парвандаи масъулини пешини ширкати "Манзили дастрас", Додгоҳи шаҳри Душанбе рӯзи 13-уми феврал ҳукми худро эълон кард. Бар пояи ин ҳукм, Нурулло Наимов, раиси пешини ин ширкат ба 21 сол ва панҷ тан аз ҳамроҳони ӯ мутаносибан аз 8 то 16 солӣ, ба зиндон маҳкум шуданд. Муштариёни "Манзили дастрас" пас аз эълони ҳукм аз он нигаронӣ карданд, ки сарнавишти маблағҳои онҳо чӣ мешавад ва оё онро бозпас гирифта метавонанд ё на.
Бар пояи ҳукме, ки аз сӯи додраси парванда Асомиддин Бобохонзода қироат шуд, Рустам Раҷабов 16 сол, Хуҷамқул Расулов 10 сол, Маҳина Раҷабова ва Хуршед Хоҷаев 9-солӣ ва Сахидод Алиев барои 8 сол аз озодӣ маҳрум шуданд. Дар мурофиаи қаблӣ намояндаи додситонӣ барои Нуруллоҳ Наимов 22 сол ва барои ҳамроҳони ӯ Рустам Раҷабов 18 сол, Маҳина Раҷабова, Хуҷамқул Расулов, Хуршед Хоҷаев ва Сахидод Алиев 10-солӣ зиндон талаб карда буд.
Боздошти Наимов ва ҳамроҳонаш бар асоси шикояти муштариёни тарҳи "Манзили дастрас" сурат гирифта, баррасии ин парванда аз як сол беш ба ин тараф идома дошт. Парвандаи онҳо дар оғоз аз ҷониби додситонии пойтахт ва сипас аз сӯи Додситонии кулли Тоҷикистон таҳқиқ ва ба Додгоҳи шаҳри Душанбе ирсол шуд.
Додраси парванда ҳангоми эълони ҳукм гуфт, ки ба ҷуз Нурулло Наимов ва Хуҷамқул Расулов, нисбати чаҳор нафари дигар қонуни афв татбиқ шуда, аз се як ҳиссаи ҳукмашон кам карда шудааст. Оқои Бобохонзода ҳамчунин гуфт, маблағи ҷабрдидаҳо аз маҳкумшудаҳо тариқи Хадамоти иҷро, бозпас гирифта мешавад. Ба гуфтаи додрас, амволи Нурулло Наимов дар ҳабс қарор дошта, ба фоидаи давлат мусодира мешавад.
Наздикони бархе аз маҳкумшудагон ва вакилони дифои онҳо ҳозир нашуданд дар робита ба ин парванда ва ҳукми додгоҳ сӯҳбат намоянд. Абдулҳафиз Қароқуллов, адвокати Нурулло Наимов дар як сӯҳбати кутоҳ ба Радиои Озодӣ гуфт, ҳоло тасмим нагирифтаанд, ки аз болои ҳукми додгоҳ ба зинаҳои болоӣ шикоят баранд ва ин масъаларо пас аз машварат бо зерҳимояаш дақиқ хоҳад кард.
Эълони ҳукм вокунишҳои зиёди муштариёнро дар пай дошт. Бархе аз муштариён, ки дар мурофиаи рӯзи 13-уми феврал иштирок доштанд, ба Радиои Озодӣ гуфтанд, ки аз ҳукми додгоҳ розӣ нестанд, чун тақдири маблағҳои онҳо ҳанӯз норӯшан боқӣ мемонад. Бархеи дигар умедворӣ карданд, ки бар асоси қарори додгоҳ, маблағҳояшон аз маҳкумшудаҳо рӯёнида мешавад.
Гулнисо Алиева, яке аз ҷабрдидаҳои "Манзили дастрас" дар сӯҳбат ба Радиои Озодӣ гуфт, хеле мехост қазия ба фоидаи онҳо ҳал шавад, вале қарори додгоҳ баръакси хостаҳои онҳо содир шуд. "Тамоми ҷо шикоят бурдем, гуфтем, ки ба фоида мо ҳал шавад, ин ҷо ба додгоҳ омадем, гуфтанд, амволи маҳкумшудаҳо ба фоидаи давлат мусодира мешавад, намедонем тақдири маблағҳои мо чӣ мешавад".
Мавлуда, яке аз ҷабрдидаҳои дигар мегӯяд, ба масъулини пешини "Манзили дастрас" 125 ҳазор сомонӣ дода буд, то соҳиби хона шавад, вале то ҳанӯз на аз хона хабаре аст ва на аз маблағ дараке.
Ба думболи нигаронии муштариён, додраси парванда гуфт, дар ҳукм манфиати ҷабрдидаҳо ба назар гирифта шудааст ва дар доираи қонун масъалаи бозпасгардонии маблағи онҳо аз ҳисоби маҳкумшудаҳо, сурат мегирад. Ба гуфтаи додрас, бозпас гардонидани маблағи муштариён ба уҳдаи Хадамоти иҷро вогузор мешавад.
Сохтмони хонаҳои "Манзили дастрас" дар Душанбе соли 2013 оғоз шуда, қарор буд, моҳи сентябри соли 2015 нахустин соҳибони худро пайдо намояд. Собиқ шаҳрдори Душанбе бо пиёда кардани тарҳи "Манзили дастрас" мехост, аҳли фарҳангу ҳунар, омӯзгорону табибон ва дар умум кормандони будҷавӣ бо манзили арзон таъмин шаванд.
Нархи як метри квадратӣ аз хонаҳои ин ширкат аз 1981 то 4501 сомонӣ вобаста ба ошёнаҳо буд, ки назар ба сохтмонҳои нав дар Душанбе арзонтар аст. Саҳми аввалияи он 50 дарсади арзиши умумии хонаро ташкил дода, маблағи боқимонда моҳ ба моҳ тақсим мешуд. Харидорон моҳе як бор онро ба суратҳисоби бонкии корхонаи "Манзили дастрас" мегузаронданд.
Аммо соли 2017 ин ширкат муфлис ва баъдан раҳбари он ҳамроҳ бо чанд тани дигар бо ҷурми қаллобӣ боздошт шуданд. Танҳо бо гузашти шаш сол ва иваз шудани раҳбари он, молики нави ширкат рӯзи 27-уми декабри соли гузашта ин тарҳи нотамомро пурра ба анҷом расонид ва дар ҳузури шаҳрдори Душанбе ба соҳибонашон супорид. Аммо бо ин мушкили гурӯҳе аз муштариёне, ки дар даст санадҳои қалбакӣ доранд, ҳалношуда боқӣ монд.