Раҳбари минтақаи Саха-Ёқутистон қарореро ба имзо расонд, ки бар асоси он ба кор қабул кардани шаҳрвандони хориҷӣ дар даҳҳо бахшҳои иқтисоди ин ҷумҳурӣ манъ мешавад. Ин қарор баъди он содир шуд, ки ҳодисаи эҳтимоли таҷовуз шудани як зани маҳаллӣ аз ҷониби муҳоҷире аз Осиёи Марказӣ боиси нооромиҳо дар минтақа шуд. Айсен Николаев дар қарораш аз рӯзи 28 март, ки дар вебсайти ҳукумати маҳаллӣ нашр шуд, кори хориҷиҳоро дар 33 бахши иқтисоди маҳаллӣ, аз ҷумла, тиҷорат, нақлиёти ҷамъиятӣ, ғизо, сохтмон ва хадамоти таксиву дигарҳо мамнӯъ эълон кардааст.
Дар матни ин қарор бо такя ба Николаев гуфта шудааст, ки ин санад “пурра мутобиқ ба қонунгузории федеролӣ” таҳия шудааст. Дар матн инчунин гуфта мешавад, ки дар тасмимгирии мақомот “вижагиҳои бозори кори ҷумҳурии Саха-Ёқутистон ба эътибор гирифта шуд ва бар асоси он, дар қабули кор бартарият ба шаҳрвандони Русия дода мешавад”.
Ин таҳаввулот чанд ҳафта баъди ҳамлаҳо зидди муҳоҷирон аз Осиёи Марказӣ сурат мегирад, ки бештари ин ҳодисаҳо дар пойтахт, шаҳри Якутск мушоҳида шудаанд.
Рӯзи 17 март полис гуфт, ки як марди 23-солаи қирғиз дар робита бо дуздиву таҷовуз ба номуси зани 36-солае боздошт шуд ва баъди ин дар шаҳр бебандуборӣ сар шуд.
28 март полис дар Якутск гуфт, ки дар давоми шаб чор мардро боздошт карданд, ки ба фурӯшгоҳи хурди марбут ба муҳоҷирон аз Осиёи Марказӣ ҳамла кардаанд. Як рӯз пеш аз ин дар шабакаҳои иҷтимоӣ як видео нашр шуд ва дар он дида мешавад, ки ҳамлагарон маҳсулоти кишоварзии дар фурӯшгоҳ гузошташударо ба сӯи соҳиби ин мағоза ҳаво медоданд ва ӯро таҳдид мекарданд. Дар видеои аз ҷониби полис нашршуда, яке аз боздоштшудаҳо мегӯяд, ки ба ҳангоми ҳамла зери таъсири машрубот буд.
Ёқутҳо мардуми туркнажод буда, нисфи сокинони минтақаро ташкил медиҳанд. Ҷамъияти Ёқутистон як миллион нафар гуфта мешавад.