Саакашвилӣ гуфт, "гардани раҳбарони Киевро мешиканад" ВИДЕО

Михаил Саакашвили, раҳбари "Ҷунбиши нерӯҳои нав"-и Украина, як рӯз баъди ихроҷи иҷбориаш ба Лаҳистон бо лаҳни тунд дар Варшава қавл дод, ки муборизаро бар зидди раҳбарони Киев идома медиҳад. Ӯ ихроҷи иҷбориашро кори президент Петро Порошенко медонад ва рӯзи 13-уми феврал дар нишасти матбуотӣ гуфт, "мо гардани Порошенко ва додситони кулл Лутсенкоро мешиканем".


"Онҳо ба зиндон мераванд - на ба Аврупо, рост ба зиндони Украина", - гуфт Михаил Саакашвилӣ. Президенти пешини Гурҷистон Михаил Саакашвилӣ, ки бо пешниҳоди президенти Украина Петро Порошенко раҳбарии минтақаи Одессаро бар дӯш гирифт, баъдан бар сари ислоҳот ва мубориза бо фасодкорӣ аз мухолифони шарики пешинаш шуд. 







Саакашвилӣ рӯзи 12-уми феврал дар яке аз тарабхонаҳои Киев аз тарафи ходимони марзбонӣ, ки дар чеҳраҳояшон ниқоб доштанд, боздошт шуд. Ӯро ба фурудгоҳ бурданд ва аз онҷо ба Лаҳистон, кишваре, ки моҳи сентябри соли 2017 тавассути он ба Украина ворид шуда буд, фиристоданд.


Михаил Саакашвилӣ, ки дар нишасти матбуотӣ гоҳ ба забони англисӣ, гоҳ ба украинӣ ва гоҳ ба русӣ сӯҳбат мекард, гуфт, сарфи назар аз ҳузураш дар хориҷи Украина аз мубориза бар зидди ҳукумати Порошенко даст намекашад.