Një vajzë 16-vjeçare nga qytetit veriperëndimor iranian i Ardabilit ka vdekur pas plagëve të marra. Ajo ishte rrahur nga policia pasi kishte refuzuar që të këndonte himnin pro-regjimit, kur shkolla e saj u bastis nga agjentët e sigurisë.
Këshilli Koordinues i Sindikatave të Mësuesve të Iranit konfirmoi se Asra Panahi ka vdekur pas bastisjes së forcave të sigurisë në shkollën e mesme të vajzave në Ardabil më 13 tetor.
Sipas këshillit, autoritetet në qytetin Ardabil i morën nxënëset nga shkolla e mesme Shahed dhe i dërguan në një protestë pro-qeveritare, duke kërkuar nga to që të këndonin himnin dhe të lavdëronin liderin suprem të Iranit, Ajatollah Ali Khamenei.
Pasi nxënëset refuzuan, forcat e sigurisë i sulmuan dhe i rrahën shumë prej tyre. Dhjetë u morën nga forcat e sigurisë dhe u dërguan në një vend të panjohur, ndërkaq shtatë u plagosën. Panahi raportohet se vdiq në një spital më 14 tetor.
Zyrtarët iranianë kanë mohuar se forcat qeveritare të sigurisë kanë rrahur nxënëset.
Irani është përballur me trazira – që paraqesin sfidën më të madhe ndaj regjimit islamik që nga revolucioni i vitit 1979 – që nga 16 shtatori, pas vdekjes së Mahsa Amini, 22 vjeçe, e cila vdiq në mbajtje policore, pasi ishte arrestuar nën dyshimet se kishte shkelur rregullat e veshjes së hixhabit, apo shamisë së kokës.
Qeveria ka mbajtur disa kundërprotesta, duke tentuar që të shtypë disidencën, por këto ngjarje kanë pasur pak efekt, pasi qytetarët ende po vazhdojnë të protestojnë në mbarë vendin. Autoritetet po ashtu kanë kryer një sërë bastisjesh nëpër shkolla, duke arrestuar dhunshëm nxënësit, veçanërisht vajzat.
Në Ardabil kanë vazhduar protestat pavarësisht kërcënimit se mund të shtypen edhe më shumë nga forcat e sigurisë. Në mediat sociale janë publikuar video ku shfaqen njerëzit duke protestuar dhe duke brohoritur “Liri” dhe “Vdekje diktatorit”, një referencë për Khamenei.
Ylli i futbollit iranian, Ali Daei, ka sfiduar ligjvënësit iranianë, duke kërkuar nga ta që të tregojnë të vërtetën lidhur me atë se çfarë po ndodh në shtet dhe të mbahen përgjegjës, pasi Kazem Mousavi, përfaqësues në Parlament i qytetit Ardabil, mohoi se vdekja e Panahit ishte shkaktuar nga rrahjet dhe gjatë një interviste pretendoi se nxënësja kishte kryer vetëvrasje.
Shoqata për Mbrojtjen e të Drejtave të Fëmijëve në Iran ka thënë se të paktën 28 fëmijë janë vrarë gjatë shtypjes së protestave dhe shumica e viktimave ishin nga provincat e Sistan-Baluçistanit dhe Kurdistanit.
Iran Human Rights, organizatë me seli në Oslo, ka thënë se të paktën 215 persona janë vrarë gjatë protestave.
Më 17 tetor, Bashkimi Evropian vendosi sanksione të reja ndaj zyrtarëve të sigurisë së Iranit, përfshirë ndaj ministrit të Informacionit dhe policisë së moralit, për shkak të shtypjes së protestave.
