Miliarderi Elon Musk ka kërcënuar me tërheqje të ofertës 44 miliardë dollarëshe për blerje të rrjetit social, Twitter, duke akuzuar drejtuesit e platformës për pengim të kërkesave të tij për të mësuar më shumë për përdoruesit e kompanisë.
Në një letër dërguar rregullatorëve, Musk ka thënë se ka të drejtë të bëjë matjet e veta për llogaritë fiktive.
Kjo letër formalizon mospajtimet që kanë qarkulluar për disa javë, meqë Musk e ka vënë “në pritje” finalizimin e marrëveshjes.
Twitter, në anën tjetër, ka mbrojtur matjet e veta.
Pas pezullimit të ofertës për afat të shkurtër kohor, Musk ka thënë se dyshon që llogaritë fiktive në këtë rrjet social përbëjnë 20 për qind të totalit të përdoruesve, në krahasim me pretendimet e Twitter-it për pesë për qind.
Mospajtimet mes palëve kanë rritur dyshimet nëse do të realizohet blerja, të cilën e ka miratuar bordi i Twitter-it në muajin prill.
Analistët kanë thënë se Musk – shef i kompanisë Tesla dhe SpaceX – mund të jetë duke përdorur çështjen e përdoruesve fiktivë për rinegociuar çmimin apo edhe për të hequr dorë plotësisht nga blerja e rrjetit social.
Musk përballet me gjobë prej 1 milion dollarëve dhe padi të mundshme, nëse heq dorë nga marrëveshja.
