Disa serbë të Kosovës, kryesisht të punësuar në institucionet publike të financuara nga Serbia, u mblodhën në qendër të Mitrovicës së Veriut të dielën( 16 janar) për të protestuar kundër vendimit të autoriteteve të Kosovës për të mos lejuar një referendum serb në Kosovë.
Protesta u mbajtën edhe në disa komuna të tjera me shumicë serbe në Kosovë.
Kryetari i Listës Serbe, Goran Rakiq, ministër për Komunitete dhe Kthim në Qeverinë e Kosovës, tha në protestë se serbët do të votojnë në zgjedhjet e shpallura nga Serbia më 3 prill dhe paralajmëroi vendosjen e reciprocitetit me Prishtinën.
Rakiq i bëri thirrje Bashkimit Evropian, shteteve të QUINT-it dhe akterëve të tjerë ndërkombëtarë që “t’i japin serbëve në Kosovë të drejtën e votës”.
Ai tha se serbët nga Kosova nuk do të “lejojnë që Prishtina t'i trajtojë ata si qytetarë të dorës së dytë”, duke theksuar se e drejta e votës është një e drejtë themelore e njeriut e garantuar me të gjitha normat dhe rregulloret ndërkombëtare, përfshirë Rezolutën 1244 të Këshillit të Sigurimit të Kombeve të Bashkuara.
Për këtë arsye ne tani po themi se zgjedhjet serbe më 3 prill do të mbahen në të gjitha sferat në Kosovë, tha Rakiq, duke shtuar se serbët nga Kosova janë të përkushtuar për një jetë të qetë dhe normale në liri.
“Ne paralajmërojmë Prishtinën dhe komunitetin ndërkombëtar se vendimi për ndalimin e referendumit do të ketë pasoja të paparashikueshme”, tha Rakiq.
Të tubuarit mbanin pankarta: “Po për të ardhmen, jo për konflikte”, “Po liri, jo jetë në skllavëri”, “Edhe serbët kanë të drejta të njeriut”.
Në një seancë të mbajtur më 15 janar, anëtarët e Komisionit Republikan të Zgjedhjeve të Serbisë (KRE) vendosën për mënyrën se si votuesit kosovarë do të mund të ushtrojnë të drejtën e tyre të votës në referendum për të konfirmuar Aktin për ndryshimin e Kushtetutës së Republikës së Serbia, e planifikuar për 16 janar.
Kryetari i KQZ-së, Vladimir Dimitrijevic, tha se votuesit nga Kosova do të mund të votojnë në vendvotimet në Kurshumli, Novi Pazar, Rashkë dhe Vranjë. Bëhet fjalë për qytete që ndodhen afër kufirit ndërmjet Kosovës dhe Serbisë.
Emrat e votuesve nga Kosova do t'i shtohen gjithsej 45 vendvotimeve, ka konfirmuar Dimitrijevic.
Transporti nga komunitetet serbe në Kosovë është organizuar dhe qytetarët do të votojnë në grup. Nisjet nga Mitrovica Veriore janë në orën 12 dhe 16.
Deputetët e Kuvendit të Kosovës të shtunën (15 janar) kanë miratuar një rezolutë që shpreh kundërshtimin që në Kosovë të mbahen votime për një referendum të shtetit të Serbisë për ndryshime kushtetuese.
Me 76 vota për, asnjë kundër dhe asnjë abstenim, Kuvendi miratoi rezolutën gjatë një seancë të jashtëzakonshme të thirrur nga kryeministri, Albin Kurti.
Sipas rezolutës, mbajtja e referendumit të Serbisë në Republikën e Kosovës, "cenon sovranitetin dhe rendin kushtetues të Republikës së Kosovës, është në kundërshtim me Kushtetutën, ligjet e Republikës së Kosovës, si dhe me normat e praktikat ndërkombëtare".
