Kancelari gjerman, Olaf Scholz, ka bërë thirrje për fleksibilitet në marrjen e masave kundër COVID-19.
Ai tha më 12 dhjetor, se në luftën kundër pandemisë së koronavirusit, nuk do të ketë vija të kuqe.
“Duhet vepruar shpejt dhe me vendosmëri. Kjo pandemi na tregoi këtë. Duhet të jemi gjithmonë të gatshëm të rimendojmë nëse rrethanat e kërkojnë një gjë të tillë”, tha ai për gazetën gjermane Bild.
Scholz ka njoftuar se janë krijuar kushtet që në spitalet gjermane të ketë shtretër të kujdesit intensiv, pavarësisht nëse do të ketë numër të madh të pacientëve me COVID-19.
Ai njoftoi po ashtu se janë duke menduar ndalimin e fishekzjarrëve në natën e Vitit të Ri, në mënyrë që të parandalohet fluksi i madh i njerëzve që mund të kërkojnë ndihmë në urgjencë.
Scholz u bëri thirrje qytetarëve që ende nuk janë vaksinuar, të marrin dozat e vaksinës kundër COVID-19.
