Ministria e Shëndetësisë njoftoi të premten, më 3 shtator se janë regjistruar edhe 26 vdekje dhe 1.448 raste të reja me koronavirus.
Sipas raportit, 15 nga viktimat ishin të gjinisë mashkullore dhe 11 të gjinisë femërore.
Nga dy viktima u regjistruan në Pejë, Malishevë, Viti, Gjilan Prishtinë, Prizren, Klinë, Ferizaj dhe Gjakovë, ndërkaq nga një rast me fatalitet u regjistruan në Podujevë, Lipjan, Skenderaj, Gllogoc, Kamenicë, Rahovec, Deçan dhe Vushtrri.
Nëntë viktima ishin të grupmoshës 70-79 vjeç, pesë viktima i përkisin grupmoshës 80 vjeç e më të vjetër, aq sa u regjistruan edhe në grupmoshën 60-69 vjeç. Ndërkaq, nga tri viktima i përkisnin grupmoshës 50-59 vjeç dhe 30-39 vjeç. Në 24 orëshin paraprak ka ndërruar jetë edhe një person i moshës 20-29 vjeç.
Rastet e reja dalin pas testimit të 12.558 mostrave në laboratorët publikë dhe privatë.
Nga kjo shifër, i bie që rreth 12 për qind e të testuarve kanë dalë pozitivë për koronavirus.
Sa i përket infektimeve, më së shumti raste janë regjistruar në grupmoshën 30-39 vjeç, përkatësisht 287 të infektuar.
Prishtina ka regjistruar numrin më të lartë të të infektuarve, ku në 24 orë janë infektuar me COVID-19 277 persona.
Gjatë 24 orëve paraprake, MSH njofton edhe për shërimin e 1.421 personave. Numri i përgjithshëm i të shëruarve, që nga paraqitja e pandemisë në Kosovë, ka arritur në 120.892.
Raste aktive me koronavirus ndërkaq janë 26.525.
Sa i përket vaksinimit, në 24 orët paraprake janë administruar 20. 479 doza të vaksinës.
Deri më tani, në Kosovë janë vaksinuar 298.445 persona me të dy dozat e vaksinës, ndërkaq në total janë administruar 882.718 doza.
