Presidenti iranian, Hassan Rohani ka thënë të hënën se Shtetet e Bashkuara do të pendohen nëse largohen nga marrëveshja bërthamore e vitit 2015 dhe se Teherani do t’i rezistojë presionit amerikan për të kufizuar ndikimin e tij në Lindje të Mesme, raporton Reuters.
“Nëse ata duan të sigurohen se nuk po krijojmë armë bërthamore, ne e kemi thënë vazhdimisht se ne nuk jemi dhe nuk do të bëjmë një gjë të tillë, mirëpo nëse dëshirojnë të dobësojnë Iranin dhe të kufizojnë ndikimin e tij qoftë në rajon apo botë, Irani do të rezistojë ashpër”, ka thënë Rohani në një fjalim televiziv.
Televizioni shtetëror iranian ka cituar ministrin e Jashtëm iranian, Mohammad Javad Zarif të ketë paralajmëruar se “reagimi i Teheranit pas ndonjë shkelje të marrëveshje bërthamore nuk do jetë i këndshëm për Amerikën”.
