Nga sulmi vetëvrasës jashtë një xhamie shiite në Kabul, janë vrarë të paktën 29 persona dhe mbi 50 të tjerë janë plagosur, ka njoftuar Ministria e Shëndetësisë së Afganistanit.
“Fatkeqësisht, 29 qytetarë afganë kanë humbur jetën dhe 52 të tjerë janë plagosur në këtë incident”, ka thënë për Radion Evropa e Lirë, zëdhënësi i Ministrisë së Shëndetësisë Wahidullah Majrooh.
Nusrat Tahimi, zëdhënës i Ministrisë së Brendshme, i ka thënë Radios Evropa e Lirë, se shumica e viktimave janë civilë.
Grupi militant, Shteti Islamik ka marrë përgjegjësinë për këtë sulm, përmes agjencisë Amaq.
“Operacioni martir i kryer me jelek vetëvrasës në një mbledhi shiite gjatë festimit të Novruzit, në qytetin e Kabulit”, ka njoftuar Amaq.
Sulmuesi vetëvrasës është ndaluar nga policia, teksa ai tentoi të hynte në xhaminë Kart-e Sakhi, ku besimtarët po kremtonin Novruzin.
