د خیبر پښتونخوا د اېچ ای وي، تور ژیړي او تېلېسیمیا ناروغیو د مخنیوي او علاج لپاره حکومتي اداره وايي، په هغه صوبه کې څه باندې ۹،۰۰۰ کسان په اېچ ای وي اخته دي او ځینې یې اېډز شوي دي. د ادارې په وینا، په هغو کې یې ۱۷۹ نرښځیان هم شامل دي. هیومن ایمیونو ډېفېشنسي وایرس یا د انسان د وجود د مدافعتي نظام د کمزورۍ وایرس د وینې او نورو داخلي رطوبتونو له لارې بدن ته ننوځي او که پر وخت یې علاج و نه شي نو اکوایرډ ایمیونو ډېفشنسي سېنډروم یا اېډز ناروغي ورڅخه جوړېږي چې بیا یې علاج شونی نه دی. دا ناروغي د وجود د مدافعتي نظام د خرابوالي ښکارندويي کوي چې له کبله یې د عامو ناروغیو لکه اسهال یا زکام جراثیم هم یو کس زښت کمزوری کولای شي. د نرښځیانو د حقونو لپاره کارکوونکي وايي، په ټولنه کې له دې روغتیايي مسلې سره د تړلي شرم او پوهاوي نه شتون له وجې د زیاتره کسانو سمه درملنه نه کېږي. تفصیل په دې راپور کې.
