د ازبکستان د صدراعظم مرستیال د یوه پلاوي په مشرۍ کابل ته رسیدلی
د طالبانو د صنعت او سوداګرۍ وزارت په ټولنیزه شبکه اېکس یا پخواني ټویټر کې لیکلي، چې د ۴۵ کسانو په دغه هیئت کې د ازبکستان د کانونو، ټرانسپورت او سوداګرۍ وزیران او ځینې نور چارواکي یا هم د هغه هېواد سوداګر شامل دي.
په دوام کې ویل شوي، چې کابل ته د ازبکستان د حکومت د دغه هیئت د سفر هدف، د دوه اړخیزې سوداګرۍ وده، د دواړو هېوادونو ترمنځ پر ټرانزیتي مسایلو بحث او په کابل کې د ازبکستان د تجارتي مالونو د یوه نندارتون پرانیستل دي.
تر دې مخکې د ازبکستان رسنیو شا و خوا لس ورځې مخکې راپور کړی و، چې د ازبکستان د حکومت یو هیئت به په دوو میاشتو کې د قوش تیپې کانال د اوبو پر سر د خبرو لپاره کابل ته سفر وکړي.
ازبکستان د امو سېند اوبو ته چې د پنبې د کښت لپاره کار اخلي، اندېښنه لري، چې ګواکې د قوش تیپې کانال د پروژې له بشپړېدو سره به د دوی په اړخ کې د دغو اوبو اندازه کمه شي.
د طالبانو د حکومت چارواکو بیا په دې اړه اندېښنې رد کړي او ویلي، چمتو دي له هغو ګاونډیو هېوادونو سره چې په دې تړاو اندېښنې لري، خبرې اترې وکړي.