یو شمېر افغان کډوال: د اسلام اباد پولیسو د پیسو اخېستو لپاره بندیان کړي وو
دا په اسلام اباد کې د یوه افغان کډوال ادعا ده، چې په وینا یې پاکستاني پولیسو شلو نورو افغانانو سره د شنبې په ورځ په اسلاماباد کې له کوم دلیل پرته نیولي وو.
هغه، چې د موضوع د حساسیت له امله ونه غوښتل نوم یې په راپور واخیستل شي ازادي راډیو سره په خبرو کې ادعا وکړه، چې له قانوني اسنادو سره سره پاکستاني پولیسو د دوی د خلاصون په موخه له هر یوه څخه لس زره پاکستانۍ کلدارې اخیستي دي.
دی وايي، وروستيو څو ورځو کې يې د ويزې موده تمديد کړې ده او په قانوني توګه په پاکستان کې د پاتې کېدو حق لري.
د ده په وينا، له دوى سره د پوليسو چلند له سپکاوي ډک و او دوی ته يې وويل، چې ورڅخه د پيسو اخيستلو په اړه بايد رسنيو ته څه ونه وايي.
نوموړی وايي: "زموږ له افغانانو څخه يو کس هلته راغى او ويې ويل، د يو نفر پر سر شل زره کلدارې راکړئ، چې خوشې مو کړي، موږ وويل، چې موږ پيسې نه ورکوو، موږ ويزې او پاسپورټونه لرو، موږ چې يې يوړو، دوه کسانو ويزې او پاسپورټونه نه درلودل او ټوکنونه يې درلودل. نورو ټولو ويزې او پاسپورټونه لرل."
یو بل افغان کډوال هم، چې د شنبې په ورځ د پاکستاني پولیسو لهخوا نیول شوی و، ازادي راډیو ته وویل: "زموږ له ثبت او راجستر وروسته هغوی په مستقیم ډول له موږ څخه وغوښتل چې هر یو لس زره کلدارې ورکړو. موږ وویل چې زموږ جرم څه دی؟ زموږ ټول اسناد بشپړ دي. موږ هېڅ جرم نهدی کړی سره له دې چې زموږ ټول اسناد بشپړ وو. له هر یوه څخه یې لس زره کلدارې وغوښتې."
تر دې مخکې په پاکستان کې د افغان بندیانو مدافع وکیلې منزه کاکړ هم ویلي وو، چې افغان کډوال د پاکستاني پولیسو لپاره د عاید سرچینه ګرځېدلې ده.
خو د پاکستان حکومت تر اوسه دغو ادعاوو ته غبرګون نهدی ښودلی.
ورته وخت کې د پاکستان په پلازمېنه اسلاماباد کې د افغان کډوالو د شورا مشر میر احمد روفي وايي، چې څو اوونۍ وړاندې یې د افغان کډوالو د ستونزو په اړه یو پرانېستی لیک د پاکستان حکومت او د ملګروملتونو بېلابېلو چارواکو ته استولی و.
نوموړي وویل:"موږ په اسلاماباد کې مېشتو کډوالو یا د افغان مهاجرینو شورا د "اعتراض" په نوم یو پرانېستی لیک ترتیب کړ چې له ۵۰۰ ډېرو کډوالو په لاسلیکونو سره مو د ملګروملتونو دفترنمايندهګۍ ته واستاوه او هم مو په اسلاماباد کې د کورنیو چارو وزارت ته مراجعه وکړه. پارلمان ته ولاړو، بشري حقونو ته مو مراجعه وکړه، خو تر دې دمه هېڅ یوه موږ ته شين څراغ نهدی ښودلی."
د طالبانو د حکومت د بهرنیو چارو د وزارت ویاند عبدالقهار بلخي د دغه راپور تر خپرېدو پورې په پاکستان کې د افغان کډوالو د ستونزو د حل په اړه زموږ پوښتنې ځواب نهکړې.
په پاکستان کې د هغو افغان کډوالو تر څنګ چې کلونه کلونه کېږي، په یاد هېواد کې مېشت دي، په افغانستان کې د طالبانو له بیا ځلي واکمنېدو وروسته په زرګونه نور افغانان هم بېلابېلو هېوادونو ته د پناه غوښتنې کېسونو د پړاوونو د بشپړولو لپاره پاکستان ته تللي دي، چې وخت په وخت دوی د پاکستاني پولیسو لهخوا ځورول شوي او شکایتونه يې کړي دي.