له افغانستانه د سرتېرو په ایستلو کې د بېنظمۍ پړه بیا د بایډن پر ادارې واچول شوه
واشنګټن ایکزامینر امریکایۍ ورځپاڼې په خپله پرونۍ ګڼه کې یوځل بیا له افغانستانه د امریکايي سرتېرو د وتلو له کبله د ولسمشر جوبایډن پر ادارې انتقادونو ته کتنه کړې.
د ورځپاڼې د لیکنې له مخې پخواني امریکايي پوځیان له افغانستانه د سرتېرو په ایستلو کې د بې نظمۍ پړه د بایډن پر ادارې اچوي.
ورځپاڼه لیکي، د پوځ د مرکزي قرارګاه پخواني درستیزوال متقاعد ډګروال سِت کرومریچ، په افغانستان کې د محاربې یوه قوماندان متقاعد ډګروال کریستوفر کولیندا او بریدګي جیکب سمیت د تېرې پنجشنبې په ورځ د استازو جرګې د بهرنیو اړیکو د فرعي کمېټې استماعیه غونډې ته په دې اړه خپل نظریات اورولي دي.
واشنګټن ایکزامینر لیکي، جمهوریپالو وکیلانو د دې استماعیه غونډې له فرصت څخه کار واخیست او له افغانستانه د امریکايي ځواکونو د وتلو پر وروستیو اوونیو یې تمرکز وکړ په داسې حال کې چې ډیموکراتان وايي، له جریاناتو د زده کړې لپاره د کانګرس نظر باید یوازې وروستۍ څو اوونۍ نه بلکې تر هغه پراخه موده راونغاړي.
خو ورځپاڼه د متقاعد ډګروال کرومیریچ له قوله ليکي چې هغه وکیلانو ته ویلي، وروستۍ خبره دا ده چې د بایډن د ادارې په مشرۍ له افغانستانه د وتلو څرنګوالی او وخت، په دې مسئله کې تر ټولو زیاته پړه او د افغانستان د ناکامۍ او سقوط په برخه کې تر ټولو زیاتې غلطۍ د دوی غاړې ته اچوي.
امریکايي ځواکونه او د امریکا په مشرۍ نور نړیوال پوځيان په ناڅاپي توګه د ۲۰۲۱ کال د اګست میاشتې په پای کې له افغانستانه ووتل چې دې کار په امریکا کې دننه او د نورې نړۍ سخت انتقادونه وپارول.
نېشنل انټرسټ:
نېشنل انټرسټ آنلاین خپرونې د یوه مطلب په سرلیک کې لیکلي چې له افغانستان سره تعامل د امریکا په ګټه دی.
خپرونه لیکي، دوه کاله وروسته له دې چې طالبان پر افغانستان واکمن شوي، د ځینو کسانو د هیلو برعکس د طالبانو د واکمنۍ پر وړاندې مقاومت تیت و پرک دی او احتمالاً د دوی تر ټولو ځواکمنه مخالفه ډله اسلامي دولت یا داعش دی.
خپرونه زیاتوي، له دې چې طالبان کوم واضح بدیل نه لري او په امریکا کې هم پر افغانستان د بل برید لپاره لېوالتیا نه شته، نو داسې ښکاري چې د امریکا د ګټو لپاره تر ټولو لږ بد انتخاب، د افغانستان له اوسني رژیم سره ګډ کار دی.
نېشنل انټرسټ د مطلب په دوام زیاتوي چې له افغانستان سره تعامل به د چین په څېر د سیالانو پر وړاندې د امریکا دریځ پیاوړی کړي او افغانستان به که د امریکا خواخوږي ورسره وي، چین د ګډ سرحد په اوږدو کې د دفاعي اقداماتو پیاوړي کولو ته وهڅوي.
خپرونه لیکي چې په دې صورت کې به هغه سرتېري، چې د افغانستان په سرحد کې ځای پرځای کېږي په ټایوان کې د چین د اشغال لپاره ونه کارول شي.