د ماشومانو د ملاتړ وجهي صندوق یا یونېسف اندېښنه ښودلې چې زرګونه افغان ماشومان سږ کال د سختې خوارځواکۍ د لاسه د مرګ له ګواښ سره مخ دي.
د یونېسف د خوړو د برخې مشرې میلاني ګلوین په یوه بیان کې ویلي چې ۸۷۵ زره افغان ماشومان سږ کال د سختې خوارځواکۍ له ګواښ سره مخ دي چې دا یې ژوند ته هم خطر پېښولای شي.
یونېسف ټینګار کړی چې له سختې خوارځواکۍ سره مخ ماشومانو ته د خوړو د برابرولو په خاطر باید دوی ته کافي بودیجه په واک کې ورکړل شي.
د ملګرو ملتونو دې ادارې خبرداری ورکړی که د خوارځواکو ماشومانو د تغدیې لپاره کافي بودیجه ورنه کړل شي زرګونه ماشومان به ومري.
