رسنۍ: په افغانستان کې د هند پروژې له خنډ سره مخ شوي
د ۲۰۲۰ کال د نومبر په میاشت کې په جنیوا کې د افغانستان په اړه په کنفرانس کې د وینا پر مهال، د هند د بهرنیو چارو وزیر ایس جی شنکر وویل: "هند په افغانستان کې په ټولو ۳۴ ولایتونو کې له ۴۰۰ څخه زیاتې پروژې پیل کړي دي.
نوموړي وویل هند په افغانستان کې د بېلابېلو پرمختیايي پروژو له لارې تر ۳ بیلیون ډالرو زیاته پانګونه کړې ده.
هند په ۲۰۲۱ کال کې د طالبانو له واکمنۍ وروسته په افغانستان کې خپل ډیپلوماټیک عملیات ودرول، خو په کابل کې یې په خپل سفارت کې یو تخنیکي ټیم ځای پر ځای کړ.
د ان ډي ټي وي په یوه خپور شوي راپور کې راغلي چې په افغانستان کې د هند پروژې له خنډ سره مخ شوې.
د هند د بهرنیو چارو وزارت ویلي چې دغه کړکېچ د افغانستان د سیاسي او امنیتي وضعیت له امله دی.
یاد وزارت په افغانستان کې د هند د پروژو په اړه دغه څرګندونې د پارلمان یوې غونډې کې وکړې.
د هند د بهرنیو چارو وزارت څرګنده کړه چې د هند په ګډون ډېرو هېوادونو په افغانستان کې خپلې پروژې درولي دي.
په همدې حال کې په افغانستان کې د طالبانو د حکومت د اقتصاد وزارت وايي، په هېواد کې د پرمختیايي پروژو بیا پیلېدل به خلکو ته د کار زمینه برابره کړي.
د دې وزارت ویاند عبدالرحمان حبیب، وایي په وروستیو کې هندي چارواکو لخوا د نیمګړو پروژو د چارو د بیا پیلېدو او بشپړېدو ډاډ ورکړل شوی.
نوموړي ازادي راډيو سره په یوه مرکه کې وویل: "د هندوستان هېواد د مخکېنۍ هوکړې پر بنسټ ۵۷۷ پراختیایي پروژو مالي ژمنه د افغانستان سره درلوده، چې له دغو پروژو څخه یو شمېر یې نیمګړې پاتې دي او تکمیل شوي نه دي، البته دا پروژې په بېلابېلو سکتورونو کې دي چې له څه د پاسه یو نیم کال راهیسې د دغو پروژو کار متوقف و."
شنونکي وايي، د هند په مرسته د پروژو بیا پیلېدل به له سیمې سره د افغانستان اړیکې ښې کړي او خلکو ته به د کار زمینه برابره شي.
تر دې مخکې د ښار جوړونې وزارت ویلي و چې تمه ده هند په افغانستان کې پر ۱۲ پروژو کار پیل کړي.
هند د طالبانو د بیا واکمنېدو وروسته هم افغانستان سره بشري مرستې کړې دي.
دې هېواد د کرونا ناروغۍ د شدت پر مهال له افغانستان سره د خوراکي خوندیتوب د برابرولو په موخه د ۷۵ زره ټنه غنمو بشري مرستې تر سره کړی.
دا د هغو مرستو دوام دی چې هند یې له کلونو راهیسې افغانستان سره کوي.
د بشردوستانه مرستو سربېره، هند په افغانستان کې مهم سړکونه، بندونه، د برښنا د لېږد لینونه، سب سټېشنونه، ښوونځي او روغتونونه جوړ کړل، خو اوس د طالبانو د بیا واکمنېدو له امله په افغانستان کې د هند له خوا شوې پانګونې له خنډ سره مخ شوي.
د افغانستان د پارلمان ودانۍ جوړول، د حبیبې لېسې بیا رغول، په کابل کې د اندراګاندي د ماشومانو روغتون جوړول ۴۳۳ نورې پراختیايي پروژې د هند د حکومت لخوا افغانستان کې بشپړې شوي دي.