شمال کې جګړه؛ مقاومت جبهه او طالبان یو بل ته د درنو تلفاتو د اړولو ادعا کړې
طالب ځواکونو ته منسوبه يوه ويډیو چې په ټولنيزو پاڼو کې خپره شوې په هغې کې ادعا کېږي چې طالبانو د مقاومت ملي جبهې غړي وژلي.
په دغه ويډو کې شپږ مړي ليدل کېږي.
دغه ويډیو د جمعې په شپه خپره شوې، خو د دقيقې نېټې په اړه یې معلومات نه شته.
اوس دواړه خواوې ادعا کوي چې د افغانستان په شمال بدخشان او بغلان ولايتونو کې يې يو بل ته درانه تلفات اړولي.
د مقاومت ملي جبهې وياند صبغت الله احمدي هم د جمعې په شپه په خپل ټوېټر تاييد کړه چې طالبانو يې ځينې غړي ورته وژلي.
نوموړي وړاندې ليکلي چې په دې جګړه کې د مقاومت جبهې دوه مخکښ قومندانان هر يو سيد بحر الدين اغا او عبدالحمید مجاهد په بدخشان ولايت کې وژل شوي.
احمدي په خپل ټوېټر ليکلي چې طالبانو په یفتل او شيوه ولسوالۍ کې غيرنظاميان تر نيول کېدو وروسته وژلي هغه ادعا چې بيا طالبان يې ردوي.
له دې وړاندې په بریتانیا کې د افغان ویتنس په نوم یو غیرانتفاعي سازمان د میزان په ۲۶ په یو څېړنیز راپور کې لیکلي و چې طالبانو د سنبلې په میاشت کې په پنجشېر ولایت کې ۲۷ اسیران وژلي دي.
د دغه راپور په اساس طالبانو په پنجشېر کې د مقاومت جبهې جنګیالي نیولي او بیا یې وژلي.
خو طالبانو بیا ادعا کړې و چې دغه کسان په جګړه کې وژل شوي.
له دې سره خوا کې بیا د مقاومت ملي جبهې ویاند صبغت الله احمدي د میزان میاشتې په ۲۹مه لیکلي و چې طالبانو د بغلان ولایت په اندراب ولسوالۍ کې د جګړې پر مهال ډېر تلفات لیدلي.
سره له دې چې طالبانو په دې اړه څه نه دي ویلي، خو د مقاومت جبهې ویاند هم د تلفاتو په اړه کره شمېر نه دی وړاندې کړی.
د ازادي راډیو خبریال هڅه وکړه چې ددغو جګړو په اړه د طالبانو او مقاومت ملي جبهې نظر واخلي، خو د طالبانو د کورنیو چارو وزارت ویاند عبدالنافع ټکور او د مقاومت جبهې ویاند صبغت الله احمدې د دې راپور تر خپرېدو د ازادي راډیو پوښتنې ځواب نه کړې.