د کرکټ د شل اورونو د نړیوال جام لومړۍ لوبه د اکټوبر په ۱۶مه د سریلانکا او نامیبیا ترمنځ ده.
د شل اورونو د کرکټ نړیوال جام لومړی ځل په ۲۰۰۷ کال کې پیل شو، کوربه یې جنوبي افریقا وه.
تر دې وروسته اووه ځله دا نړیوالې لوبې په بېلابېلو هېوادونو کې ترسره شوې دي.
تر اوسه دا جام دوه ځله ویسټ انډیز ګټلی دی، له دې پرته هند، پاکستان، انګلستان، سریلانکا او اسټرالیا یو یو ځل دا جام خپل کړی دی.
په تېرو نږدې شپږو پېړیو کې چې د کرکټ لوبې د انګلستان له جنوب ختیځه پيل شوې چې بیا د بریتانیا له امپراتورۍ سره خپرې شوې د نولسمې پېړۍ په پيل کې د کرکټ د نړیوالې شورا له رامنځته کېدو سره یې نړیوالې مسابقې شروع شوې.
د کرکټ نړیوال جام پخوا یوازې یو ورځنۍ وه چې لومړی ځل په نولس سوه پنځه اویایم کال کې وشو، دا جام هر څلور څلور کاله وروسته ترسره کېږي او راتلونکې لوبې یې په دوه زره درویشتم کې په هند کې دي.
د ټسټ لوبو نړیوال جام هم اوس پیل شوی دی چې تېر کال نیوزیلنډ خپل کړ.
د شل اورونو په لومړیو دوو نړیوالو جامونو کې افغان لوبډله ونه لوبېده له هغه راوروسته یې دې جام ته لار وکړه خو تر دې دمه یې د پام وړ نتیجه نه ده ترلاسه کړې.
د افغانستان د کرکټ بورډ عمومي رییس میرویس اشرف ازادي راډیو ته وویل چې هیله من دی چې سږکال به په نړیوال جام کې افغان لوبډله ښه وځلېږي.
هغه زیاتوي: "تیاریانې ښې دي. لوبغاړي جسماً هم ښه چمتو شوې دي. په اسټرالیا کې پنځلس شپاړس ورځې تمرینات چې د قرنطین پرمهال ترسره کېږي ډېر څه دي، چې له دې سره به که خدای کول چمتوالی نور هم ښه شي."
افغان لوبډله به خپله لومړۍ لوبه په دې جام کې د اکټوبر په دوه ویشتمه له انګلستان سره وکړي.
څلور ورځې وروسته تر دې له بلې پياوړې ډلې نیوزیلنډ سره د افغانستان لوبه ده، له افغانستان سره په ګروپ کې کوربه اسټرالیا هم ده او دوې نورې هغه لوبډلې به له دې ګروپ سره یوځای شي چې د غوراوي پړاو په سیالیو کې وروسته دې ګروپ ته راځي.
په تېرو پنځلس کلونو کې د شل اووره نړیوال جام لوبې د کرونا وبا او یو شمېر نورو دلایلو له امله په منظم ډول نه دي ترسره شوي، خو تر دې وروسته چې د کرکټ نړیوالې شورا کوم پلان ورته جوړ کړی دی، د دې جام لوبو مهالوېش یې منظم کړی دی.
ټاکل شوې ده چې دوه کاله وروسته د شل اورونو د کرکټ نړیوال جام په ویسټ انډیز او د امریکا په متحدایالتونو کې ترسره شي له هغه دوه کاله وروسته به هند او سریلانکا د دې جام کوربانه وي، په دوه زره اته ویشتم کې به اسټرالیا او نیوزیلنډ کې دا لوبې وشي او په دوه زره دېرشم کال کې اټکل کېږي چې بریتانیا او ایرلنډ به د شل اورونو د نړیوال جام کوربانه شي.
