د خبريالانو نړيواله کمېټه: طالبان دې له استرالیایۍ خبریالې بښنه وغواړي
دې استرالیایي خبریالې چې د امریکا له فارین پالیسي مجلې سره کار کاوه له افغانستانه تر وتلو وروسته ویلي، طالبانو توقیف او په زوره یې بښنې غوښتنې ته مجبوره کړې ده.
د خبریالانو د خوندیتوب نړیواله کمېټه وایي، طالبان باید د کورنیو او بهرنیو خبریالانو د ځورولو او سپکولو کمپاین ودروي.
د دغې کمېټې د پروګرامونو مشر ( Carlos Martinez de la Serna) کارلوس مارټاینز دیلاسرنا ویلي، د طالبانو له استخباراتو باید د خبریالانو د ګواښولو او توقیف پوښتنه وشي.
د خبریالانو د خوندیتوب کمېټې په یوه اعلامیه کې د نوموړي په حواله راغلي چې طالبان باید له استرالیایۍ خبریالې لین اودانېل نه له هغې سره د شوي چلند له کبله بښنه وغواړي او خبریالان پرېږدي چې په ازاد ډول خپل کار وکړي.
د استرالیایۍ خبریالې لین اودانېل کیسه وروسته تر هغه ډېره رسنیزه شوه چې هغه په وروستیو ورځو کې له افغانستانه ووته او وې ویل چې طالبانو توقیف او په زوره یې د راپورونو په اړه بښنې غوښتنې ته مجبوره کړه.
د خبریالانو د خوندیتوب نړیواله کمېټه وایي، طالبانو دغه خبریاله ویرولې، ګواښلې او په زوره یې د بښنې غوښتنې ټویټ پرې کړی دی.
اودانېل د خبریالانو د خوندیتوب کمېټې ته ویلي، کله چې د جولای په شپاړسمه کابل ته ورسېده، په سبا یې د طالبانو بهرنیو چارو وزارت ته ولاړه چې ځان د بهرنۍ خبریالې په توګه ثبت کړي.
نوموړې ویلي، د وزارت ویاند عبدالقهار بلخي د هغې د ثبتولو غوښتنه رد کړه او ورته یې وویل چې د طالبانو د قومندانانو له خوا په زور د نجونو او ښځو ودولو په اړه د ۲۰۲۱ کال راپورونه یې غلط دي.
اودانېل ویلي، بلخي ورته وویل چې استخباراتي مسولان ورسره اړیکه نیسي او ممکن ترې وغواړي چې له دې هېواده ووځي.
نوموړې د خبریالانو کمېټې ته ویلي، د طالبانو استخباراتو د جولای په ۱۹ له خپل مېلمستون نه شش درک سیمه کې د ملي امنیت یوه دفتر ته بوتله او هلته یې څلور ساعته همدا خبرې ورته کولې چې که بښنه ونه غواړي زنداني به شي.
د طالبانو د بهرنیو چارو وزارت ویاند عبدالقهار بلخي بیا ویلي، دغې استرالیایي خبریالې ته یې ځکه د فعالیت ځانګړی اجازه لیک ورنه کړ چې دده په ټکو " په ښکاره ډول یې د طالبانو پر ضد د وسله وال مقاومت ملاتړ کاوه".
بلخي زیاته کړې، دغې خبریالې د خپلو هغو راپورونو په اړه ثبوت نه دی ورته وړاندې کړی چې دې د یو شمېر طالب قومندانانو له خوا په زوره د نجونو د ودولو او له هغوی د جنسي غلامې په توګه د استفادې په تړاو لیکلي وو.
بل لورته پرون هم د طالبانو مشر ملاهبت الله اخوندزاده په یوه لارښود کې وویل چې د طالبانو پر غړو او مسولانو "بې ځایه تور او له واقعیت څخه لرې نقد شرعا جواز نه لري".
طالبانو که څه هم ویلي چې خبریالانو ته د ازاد فعالیت اجازه ورکوي، خو یوناما، د خبریالانو ملاتړو بنسټونو او خپله خبریالانو په وار وار ویلي چې پر رسنیز فعالیت فضا تنګه شوې او خبریالان ډاډه فعالیت نهشي کولای.