د اوکراین اقتصادي ملاتړ لپاره د نهه نیم میلیارد ډالرو پر مرسته موافقه وشوه
د نړۍ اوو سترو صنعتي هېوادونو یا جي اوه ډلې د اوکراین د اقتصادي فعالیت د دوام لپاره د نهه نیم میلیارد ډالرو پر مرسته موافقه وکړه.
د راپورونو له مخې دې هېوادونو ویلي، باید دا یقین ترلاسه شي چې اوکراین د روسیې له یرغل وروسته د خپل ځان د دفاع توان لري او د دولتي مامورینو د معاشونو په ګډون عامه خدمات وړاندې کولای شي.
د جرمني د مالیې وزیر کریستیان لندنر چې هېواد یې د جي اوه دوره يي مشري کوي، پرون خبریالانو ته وویل، چې د اوکراین له اقتصاد سره د نړیوالو مرستې به سږکال شاوخوا شل میلیارد ډالرو ته ورسېږي.
هغه وايي: "موږ موافقه وکړه چې اقتصادي وضعیت باید د اوکراین بریالۍ دفاع اغېزمنه نه کړي. موږ به د نړیوالو مالي بنسټونو په همکارۍ اوکراین ته په لنډمهال کې ۱۹،۸ میلیارد ډالره مستقیمې مالي مرستې برابرې کړو."
د جرمني د مالیې وزیر په وینا ۷،۵ میلیارد ډالر به امریکا، یو میلیارد جرمني او پاتې یو میلیارد به د جي اوه ډلې نور غړي په ګډه چمتو کړي.
په جي اوه ډله کې پر امریکا او جرمني سربېره برتانیا، فرانسه، ایټالیا، کاناډا او جاپان غړیتوب لري.
د راپورونو له مخې د دې ډلې د پرونۍ غونډې بحثونه ترډېره پر اوکراین د روسیې پر یرغل متمرکز وو.
له دې یوه ورځ مخکې د امریکا د مشرانو جرګې له اوکراین سره په پوځي او اقتصادي برخو کې د څلوېښت میلیارد ډالرو طرح تصویب کړه.
د امریکا د استازو جرګې تېره اونۍ دا سند تصویب کړی و.
دا لایحه د ولسمشر جو بایډن په غوښتنه کانګرس ته وړاندې شوه او اوس به د ده له لاسلیک وروسته توشېح شي.
د پیسو نړیوال صندوق اټکل کوي، چې د اوکراین اقتصاد به سږکال او بل کال په سلو کې تر ۳۵ پورې کسر ولري.