طالبان: پاکستان سره تازه هوکړه د دواړو هېوادونو په ګټه ده
د دغه وزارت ویاند مولوي زهیر ازادي راډیو ته وویل، کابل او اسلام اباد هوکړه کړې چې د یو بل له خاورېبه د سوداګریزو توکو د ټرانزیټ لپاره استفاده کوي.
د نوموړي په خبره د ۱۴۰۱ لمریز کال د وري له لومړۍ نېټې به د افغانستان او پاکستان ترمنځ د سوداګریزو لاریو ازاد تګ راتګ پیل شي.
د افغانستان لپاره د پاکستان ځانګړی استازی صادق خان هم پر خپل ټویټر لیکلي، د مارچ له ۲۱مې نېټې وروسته افغاني لارۍ چلوونکي کولی شي، پاکستان ته د صادراتو او وارداتو لپاره په کابل کې د پاکستان له سفارت او کندهار کې د دغه هېواد له کونسلګرۍ څخه پاکستان ته د ننوتو اجازه پاڼه ترلاسه کړي.
دغه شان پاکستانۍ لارۍ چلوونکي بیا کولی شي په پېښور او کوټه کې د افغانستان له کونسلګریو څخه ورته پاڼې ترلاسه کړي.