راپورونه: کیف په څنډو کې د روسیې لوی پوځي کاروان درېدلی
د سټلایټ له خوا په اخیستل شوېو تصویرونو کې ښکاري چې د زغروالو وسایلو او توپونو دغه کاروان څه باندې ۶۵ کیلومتره اوږد دی او د پلازمېنې کیف تر څو کیلومترۍ پورې رسیدلی.
د اوکراین وسله وال ځواکونه داسې انګیري چې ښایي دا به د اوکراین د پلازمېنې کیف او د تر ټولو لوی ښار ماریپول د محاصره کولو او پرې د کنټرول راوستو لپاره یوه هڅه وي.
د جګړې په ډګر کې دغه نوي پرمختګونه وروسته له هغې کېږي چې د یوه اوربند لپاره په بېلاروس کې د اوکراین او روسیې د پلاوو ترمنځ خبرې پرون بې نتیجې پای ته ورسېدې خو دواړو لورو موافقه وکړه چې راتلونکو ورځو کې به بیا خبرې ترسره کړي.
په عین حال کې د اوکراین ولسمشر ولودیمیر زلنسکي پرون په یوه ویډیویي پیغام کې مستقیماً له روسي ځواکونو وغوښتل چې امرونه دې له پامه وغورځوي او جګړه دې بنده کړي.
زلنسکي پرون پر کیف د روسي ځواکونو درې توغندویو بریدونو ته په اشارې وویل، کله چې یوه خوا بله خوا په توغندیو او توپونو ولي، کیف به چا ته امتیازات ورنه کړي.
دغه راز د اوکراین هوایي ځواکونو ویلي چې د پلازمېنې کیف شااوخوا ښارګوټو کې د هوایي عملیاتو په مهال یې د روسیې پنځه جنګي الوتکې او یوه هلیکوپټره په ډزو رانسکورې کړي دي.