د روسیې پر وړاندې د امریکا اروپايي متحدان د څه ډول اقدام نیت لري؟
د اسوشیټېډ پرېس خبري اژانس د راپور له مخې، د امریکا ولسمشر جو بایډن تر ډېره توانېدلی چې خپل اروپايي متحدان سره راټول کړي، څو پر اوکراین د روسي ځواکونو د برید په صورت کې د سختو اقداماتو ژمنه وکړي.
امریکا، ترکیې او بریتانیا له اوکراین سره د ټانک ضد راکټونو، بې پېلوټه الوتکو او پیسو د برابرولو لپاره چمتووالی ښودلی دی.
په داسې حال کې چې له اوکراین سره د روسیې د پولو په اوږدو کې ترینګلتیا زیاته شوې، تېره اوونۍ د امریکا او روسیې د بهرنیو چارو وزیرانو د سویس په جنیوا ښار کې خبرې وکړې، خو د دوی خبرې بې نتیجې پای ته ورسېدې.
د فرانسې ولسمشر ایمانویل مکرون چې اوس یې هېواد د اروپايي اتحادیې مشري په غاړه لري، پرون چهارشنبې په بروکسل کې د دې اتحادیې پارلمان ته په وینا کې وویل: "په راتلونکو څو اوونیو کې، موږ باید یو اروپايي وړاندیز چمتو کړو چې د امنیت او ثبات یو نوی نظم رامنځته کړي. موږ باید د هغو اروپایانو په توګه چې په ناټو کې زموږ له متحدانو سره کار کوي، دا کار وکړو او بیا هغه له روسیې سره د خبرو لپاره چمتو کړو."
لوېدیځ هیوادونه وايي، په دې اندېښمن دي چې روسیه پر اوکراین بلې حملې ته پلمې لټوي.
اوکراین بیا د روسیې د حملې پر وړاندې له لوېدیځو هېوادونو وسله والو مرسته غوښتې.
په همدې منځ کې د ټانک ضد وسلو په شمول د بریتانیا پوځي مرسته د اوکراین پلازمېنې کیف ته رسېدلې ده.
مسکو پر اوکراین د حملې پلان ردوي، خو دا یې ویلي چې که له ناټو سره د اوکراین د نه یوځای کېدو په ګډون د روسیې یو شمېر غوښتنې ونه منل شي، مسکو یو لړ نامعلوم پوځي اقدامات کولی شي.
د کریملین ویاند دیمیتري پیسکوف پرون چهارشنبه(د مرغومي ۲۹مه) د اوکراین د پولې په اوږدو کې ترینګلتیاوو ته په اشارې خبریالانو ته وویل: "په اوکراین کې د کړکېچن وضعیت په اړه، حالت په رښتیا ترینګلی دی. موږ وینو چې وسله ورکول کېږي، موږ هلته د لوېدیځو هېوادونو راز-راز پوځي تمرینونه او خوځښتونه وینو، دا ټول د اوکراین په شااوخوا کې د کړکېچ سبب کېږي."
په همدې منځ کې د امریکا د بهرنیو چارو وزیر انتوني بلېنکن پرون په کیف ښار کې د امریکا د سفارت له کارکوونکو سره د کتنې پر مهال د روسیې له ولسمشر ولادیمیر پوتین څخه وغوښتل چې سوله ییزه لار خپله کړي.