د فوټبال دوه افغانې لوبڅارانې د مرکزي اسیا د نجونو د فوټبال په سیالیو کې لوبڅاري کوي.
د افغانستان د فوټبال فدراسیون ویلي چې دوه افغانې لوبڅارانې فرحناز جلالي او سونیا نوري په همدې هدف نن تاجیکستان ته ولاړې.
د دې فدراسیون ویاند فیروز معشوف نن پنجشنبه (د چنګاښ په ۱۰مه) ازادي راډيو ته وویل، فرحناز جلالي د لوبغالي د منځنې لوبڅارې او سونیا نوري د مرستیال لوبڅارې په توګه د مرکزي اسیا تر ۱۷ کلنو کم عمره نجونو د فوټبال په سیالیو کې د لوبڅارۍ په موخه تاجیکستان ته بلل شوې وې.
ښاغلی معشوف وايي، دغه ګام د افغانستان د فوټبال لوبڅارانو د ظرفیت لوړونې په هدف ترسره کېږي.
دا سیالۍ تېره ورځ پیل شوي او نهه ورځې دوام کوي.
په دې سیالیو کې د افغان لوبډلې په ګډون د ایران، قرغزستان، ازبېکستان او تاجیکستان لوبډلو برخه اخېستې ده.
