په میانمار کې لا هم پر معترضانو د پوځ ځپونکي عملیات دوام لري او په دې ترڅ کې د راپورونو له مخې پرون دوشنبې(د وري ۹مه) د دې هېواد په لوی ښار ینګون کې پنځه تنه مظاهره چیان د اعتراضونو پر مهال ووژل شول.
له پوځي کودتا وروسته د روانو اعتراضونو په ترڅ کې تېره شنبې تر ټولو خونړۍ ورځ وه چې ۱۱۴ مظاهره چیان ووژل شول. په دې ورځ زرګونه کسان د میانمار په بېلابېلو ښارونو کې لارو کوڅو ته راووتل او په دې هېواد کې یې د پوځي واکمنۍ د ختمېدو او د پرځول شوي حکومت د بندیوانې مشرې انګ سان سوچي د خلاصېدو غوښتنه وکړه. د فرانس پرېس خبري اژانس د راپور له مخې په وژل شوېو کې ۷ ماشومان هم شامل وو.
د ملګرو ملتونو غبرګون
د ملګروملتونو سرمنشي انتونیو ګوتېریش پرون دوشنبه (د وري ۹مه) په یوه خبري غونډه کې وویل چې په میانمار کې د تشدد دا کچه د منلو نه ده.
نوموړي وویل: "دا قطعاً د منلو وړ نه ده چې وینو د خلکو پر وړاندې په دومره لویه کچه تشدد کېږي، ډېرخلک وژل کېږي او د سیاسي بندیانو د خوشې کولو او په میانمار کې د جدي سیاسي انتقال پر وړاندې دومره کلک ممانعت کېږي."
سرمنشي ګوتېریش زیاته کړه، نړیواله ټولنه یووالي او ژمنتیا ته اړتیا لري، څو په میانمار کې د وضعیت د عادي کېدو په هدف فشارونه زیات کړي.
امریکا له میانمر سره سوداګري وځنډوله
بل خوا متحدو ایالاتونو د ۲۰۱۳ میلادي کال د سوداګرۍ او پانګونې د موافقې پر اساس له میانمار سره خپل ټول تماسونه ځنډولي دي.
د امریکا د سوداګرۍ استازې کاترین ټای پرون د مارچ په ۲۹ مه نېټه په یوه بیان کې وویل، له میانمار سره به سوداګریز اړیکې تر هغه وخته ځنډېدلي وي چې په دې هېواد کې د ډیموکراسۍ د اصولو په رڼا کې منتخب حکومت نه وي راغلی.
په پام کې ده چې د ملګرو ملتونو امنیت شورا د چهارشنبې په ورځ په میانمار کې د روان وضعیت په اړه بحث وکړي. ډيپلوماتیکې سرچینې وايي، د دې بېړنۍ غونډې د جوړېدو غوښتنه بریتانیا کړې ده.
د چین غبرګون
د امنیت شورا بل غړي چین هم په میانمار کې د روان تشدد له کبله اندېښنه ښودلې او د بهرنیو چارو وزارت ویاند ژاو لي ژیان پرون وویل، روانې خونړۍ نښتې د هېڅ لوري په ګټه نه دي.
هغه زیاته یې کړه، د دې تاوتریخوالي اصلي قربانیان خلک دي.
مسکو هم خواشینی دی
روسیې چې مرستیال دفاع وزیر او څو نورو چارواکو یې د روانې اونۍ په پیل کې په میانمار کې په یوه پوځي پرېډ کې برخه واخیسته اعتراف کړی چې له نای پیتاو Naypyitaw سره خپل اړیکي پراخوي خو د کریملین ویاند دیمیتري پیسکوف په عین حال کې وویل، د دې مانا دا نه ده چې مسکو د میانمار روان خواشینوونکي جریانات تاییدوي.
په میانمار کې د سیاسي بندیانو د مرستندویې ټولنې د فعالانو د ارقامو له مخې د فبروري د لومړۍ نېټې له کودتا راهیسې له ۴۵۰ زیات کسان وژل شوي دي.
