په قطر کې د طالبانو سیاسي دفتر وايي، طالب مرکچیانو له امریکايي چارواکو سره د سولې د بهیر پر چټکوالي خبرې وکړې.
د دې دفتر ویاند محمدنعیم رسنیو ته په استولي غږیز پیغام کې ویلي دي چې د طالبانو د سیاسي دفتر مشر ملا عبدالغني برادر د افغانستان د سولې لپاره د امریکا له ځانګړي استازي زلمي خلیلزاد او په افغانستان کې د دېره امریکايي ځواکونو له عمومي قوماندان جنرال سکاټ مېلر سره وکتل.
ښاغلي نعیم زیاته کړه: "په دې ناسته کې دواړو لورو د دوحې موافقې ته خپله ژمنتیا وښوده او د پوره عملي کېدو په اړه یې خبرې وکړې. همدا راز د افغانستان پر روان وضعیت او د بین الافغاني خبرو د روان بهیر د چټکتیا او اغېزمنتیا په اړه بحث وشو."
په داسې حال کې چې په واشنګټن کې د امریکا او طالبانو موافقې ته بیا کتنه روانه ده.
ښاغلی خلیلزاد د پنجشنبې په ورځ دوحې ته ورسېد، خو مخکې له هغه یې سیمې ته د سفر په پیل کې په کابل کې له افغان چارواکو او سیاسي شخصیتونو سره د سولې د مذاکراتو په اړه خبرې وکړې.
