د چچنیا چارواکي: ګروزني کې ۴ افراطي وسله وال وژل شوي
د قانون د تنفیذ چارواکو رسنیو ته ویلي، نن د ځانګړو عملیاتو پر مهال د ملي ګارډ دوه ساتونکي وژل شوي او یو پولیس ټپي شوی دی.
د تاس خبري اژانس په ګدون ځینو نورو سرچینو بیا ویلي، چې د قانون د تنفیذ درې افسران هم د وسله والې جګړې پر مهال وژل شوي دي.
چارواکي وايي، دغه ځانګړي عملیات یونیم ساعت روان وو او هغه کور چې افراطي وسله وال په کې پټ وو، په اور سوځول شوی دی.
د چچنیا چارواکو دوې ورځې مخکې هم د دوو افراطي وسله والو د وژل کېدو خبر ورکړی و.
د دې خبر کره کول ګران کار دی، چې وژل شوي کسان رښتیا هم افراطي وسله وال دي که څنګه، ځکه د چچنیا رهبر رمضان قدیروف چې کرملین یې ملاتړ کوي، زیات وخت هغه کسان افراطي وسله وال یا تروریستان بولي، چې د ده د استبدادي واکمنۍ په وړاندې مبارزه کوي.